Tveggja ára uppgangur á hlutabréfamörkuðum, knúinn áfram af trú á að gervigreind myndi leiða til nýrrar framleiðniöldu, tók skyndilegan snúning á mánudag þegar kínverska fyrirtækið DeepSeek vakti ótta hjá fjárfestum.
Nvidia, helsti örflöguframleiðandi heims, varð fyrir stærsta dagsverðfalli í sögu almennra hlutafélaga.
Virði félagsins féll um nærri 600 milljarða Bandaríkjadala eftir að DeepSeek kynnti nýtt gervigreindarlíkan sem keppir við framúrstefnuleg kerfi OpenAI.
DeepSeek er hugarfóstur Liang Wenfeng, sem rekur 8 milljarða dala vogunarsjóðinn High-Flyer, en samkvæmt The Wall Street Journal hefur fyrirtækið látið lítið fyrir sér fara síðastliðin tvö ár.
Gervigreindarlíkanið „R1“ vakti gríðarlega athygli en að sögn þeirra sem þekkja til sýnir það framúrskarandi hæfni í röksemdafærslu og lausn flókinna verkefna.
Helsta nýjung DeepSeek er þó að kerfið krefst mun minni vinnsluminni til þjálfunar en sambærileg kerfi, sem getur dregið úr þörfinni á hágæða flögum frá Nvidia.
Verðfall Nvidia hafði víðtæk áhrif á markaðinn í gær en hlutabréf Broadcom og Micron Technology féllu um meira en 10%, og tæknigeiri S&P 500 lækkaði um 5,6% sem er mesta dagslækkun geirans í fjögur ár.
Samtals töpuðust um 1.000 milljarðar Bandaríkjadala að markaðsvirði.
Þrátt fyrir áfallið hélt Nvidia því fram að framtíðarsala þeirra á flögum væri áfram sterk, enda þurfi enn mikla afkastagetu til að keyra stór gervigreindarmódel.
Fjárfestar vara við bóluhættu
Fjárfestar hafa lengi varað við mögulegri bólumyndun meðal tæknifyrirtækjanna en líkt og Viðskiptablaðið greindi frá á föstudaginn var áhættuálag bandarískra hlutabréfa [e. equity risk premium] orðið neikvætt og er á svipuðu reiki og þegar netbólan sprakk um aldamótin.
Samkvæmt gagnaveitu Bloomberg hefur væntur hagnaður sem hlutfall af hlutabréfaverði [e. forward earnings yield] S&P 500-vísitölunnar fallið niður í 3,9%, á sama tíma og ávöxtun tíu ára bandarískra ríkisskuldabréfa er 4,65%.
Mikil fjárfesting í hlutabréfum tæknifyrirtækja hefur vakið áhyggjur, en sjö stærstu fyrirtæki S&P 500 mynda nú 34% af markaðsvirði vísitölunnar, samkvæmt Goldman Sachs.
