Stjórn Play hefur safnað áskriftarloforðum að andvirði 1.400 milljónir króna til viðbótar við áskriftir að upphæð 2.600 milljónir króna sem áður var tilkynnt um í lok febrúar.
Skilyrði áskrifta um lágmarksáskrift fyrir a.m.k. 4 milljörðum hefur því verið uppfyllt samkvæmt Kauphallartilkynningu félagsine. Áskriftirnar eru nú því eingöngu háðar því skilyrði að hluthafar PLAY samþykki að auka hlutafé félagsins á næsta aðalfundi.
Áskriftargengi á hvern hlut er 4,5 kr.
Til viðbótar við hlutafjáraukningu mun stjórn félagsins leggja til við hluthafa að stjórninni verði veitt umboð til að efna til almenns útboðs að jafnvirði allt að 8 milljónum evra sem samsvarar um 1,2 milljörðum íslenskra króna á gengi dagsins .
Áskriftargengi á hvern hlut verður 4,5 kr. en núverandi hluthafar félagsins munu njóta forgangs ef til umframáskriftar kemur til að tryggja jafnræði.
Flugfélagið áætlar jafnframt að yfirfærsla Play á aðalmarkað geti átt sér stað fyrir lok annars ársfjórðungs.
„Það hefur verið virkilega ánægjulegt að verða vitni að þeim jákvæðu undirtektum sem fjárfestar hafa sýnt kynningu okkar á hlutafjáraukningunni. Með þeim skuldbindingum sem við höfum nú móttekið ásamt skuldbindingum okkar stærstu hluthafa, sem áður hafði verið tilkynnt um, hefur Play nú tryggt sér 4 milljarða eiginfjár innspýtingu. Sú tala kann að stækka í kjölfar útboðs sem áætlað er í kjölfar aðalfundar félagsins í mars,” segir Birgir Jónsson forstjóri Play.
„Hlutafjáraukningin styrkir fjárhagsstöðu félagsins verulega og gerir því kleift að grípa spennandi tækifæri til vaxtar og/eða mæta óvæntum áföllum. Þetta er mikilvægur áfangi fyrir okkar góða félag og starfsfólk félagsins. Það er magnað að upplifa hvernig fagmennskan hjá starfsfólki félagsins heldur áfram að þróast. Metnaðurinn hjá hópnum er einstakur og það eru lífsgæði að starfa með jafn öflugu fólki og hér er að finna hjá PLAY,“ segir Birgir.
