Alþjóðagjaldeyrissjóðurinn hefur lækkað hagvaxtarhorfur konungsríkisins Sádí-Arabíu fyrir árið. Samkvæmt spá sjóðsins verður hagvöxtur í Sádi-Arabíu í ár um 1,7% í stað 2,6% eins og áður var spáð.
Um er að ræða mestu lækkun á efnahagshorfum meðal þeirra landa sem lúta reglubundinni úttekt hjá sjóðnum.
Samkvæmt Bloomberg gæti þetta haft neikvæð áhrif á konungsríkið sem hefur verið að auka skuldir sínar til að fjármagna draumsýn krónprinsins Mohammed Bin Salman um að gjörbreyta efnahag landsins.
Í skýrslu AGS segir að samdrátturinn komi alfarið til vegna ákvörðunar konungsríkisins að draga úr olíuframleiðslu en Sádi-Arabía hefur ásamt öðrum OPEC-ríkjum verið að skerða olíuframleiðslu til að ýta heimsmarkaðsverði á olíu upp á við.
Nýverið ákváðu OPEC-ríkin að halda áfram að skerða framleiðsluna langt fram á næsta ár.
Mohammed al-Jadaan fjármálaráðherra Sádi Arabíu sagði nýverið að halli ríkissjóðs, sem er um 2% af landsframleiðslu, væri ásættanlegur eins og staðan er núna. „Svo lengi sem hallinn er tilkominn vegna framsækinna verkefna, þá held ég þetta sé jákvætt,“ sagði Mohammed al-Jadaan í viðtali við CNBC á dögunum.
Hins vegar er Saudi Aramco ekki sama peningavélin og áður fyrir konungsfjölskylduna.
Upphaflega stóð til að selja hluti fyrir um 40 til 50 milljarða dali í olíufyrirtækinu í ár en á endanum ákvað fjölskyldan að selja 0,64% hlut á 11,2 milljarða.
Markaðsvirði 97% hlutar konungsfjölskyldunnar er metið á 1,8 billjónir (e. trillion) dali en þar sem félagið er skráð í kauphöllina í Sádi-Arabíu hefur gengið illa að fá stóra fjárfestingasjóði til að fjárfesta í því.
Sádarnir sóttu sér nýverið 11,2 milljarða Bandaríkjadali með hlutafjárútboði í krúnudjásni konungsríkisins, Saudi Aramco.
Samhliða því seldi þjóðarsjóður Sáda hlutabréf í bandarískum fyrirtækjum fyrir um 15 milljarða dali til að halda áfram að fjármagna draumsýn MBS.
Í fyrra lagði Þjóðarsjóður Sáda hinni svokölluðu Línuborg til 48 milljarða dala, fjárfesti 100 milljörðum í örflögutækni og stofnaði nýtt flugfélag, Riyadh Air, svo dæmi séu tekin.
