Samningur um kaup Landsbankans á TM tryggingum hf. af Kviku banka var undirritaður í síðustu viku. Endanlegt kaupverð var 28,6 milljarðar króna líkt og kveðið var á um í tilboðinu en endanleg greiðsla fyrir tryggingarfélagið er háð kaupverðsaðlögun á þeim degi sem bankinn tekur við rekstri þess.
Eiríkur Magnús Jensson fjármálastjóri Kviku segir söluna auka slagkraftinn í bankastarfsemi Kviku og gera bankanum kleift að sækja enn frekar fram.
„Í einföldu máli gerir salan á TM okkur kleift að færa eigið fé sem er í dag í tryggingarstarfseminni yfir í bankahluta samstæðunnar. Eigið fé í bankastarfseminni er því að aukast verulega sem mun skila sér í tækifærum á að vera með breiðara vöruframboð þegar kemur að lánsfjármögnun fyrir fyrirtæki og einstaklinga,“ segir Eiríkur.
Samningur um kaup Landsbankans á TM tryggingum hf. af Kviku banka var undirritaður í síðustu viku. Endanlegt kaupverð var 28,6 milljarðar króna líkt og kveðið var á um í tilboðinu en endanleg greiðsla fyrir tryggingarfélagið er háð kaupverðsaðlögun á þeim degi sem bankinn tekur við rekstri þess.
Eiríkur Magnús Jensson fjármálastjóri Kviku segir söluna auka slagkraftinn í bankastarfsemi Kviku og gera bankanum kleift að sækja enn frekar fram.
„Í einföldu máli gerir salan á TM okkur kleift að færa eigið fé sem er í dag í tryggingarstarfseminni yfir í bankahluta samstæðunnar. Eigið fé í bankastarfseminni er því að aukast verulega sem mun skila sér í tækifærum á að vera með breiðara vöruframboð þegar kemur að lánsfjármögnun fyrir fyrirtæki og einstaklinga,“ segir Eiríkur.
Spurður um hversu mikla aukningu er að ræða, segir Eiríkur um 40%.
„En við erum að gera ráð fyrir að um helmingurinn af kaupverðinu verði greiddur til hluthafa sem arður og þá standa eftir um 14 milljarðar af eigin fé sem bætist við bankastarfsemina sem nemur um 36 milljörðum í dag. Þannig þetta er nærri 40% aukning á eigin fé bankans, sem eykur útlánagetu og annað slíkt hjá okkur til muna,“ segir Eiríkur.
„Þetta er ein af ástæðunum fyrir því að það var skynsamlegt að fara í þessa vegferð að selja TM því þá myndi losna um eigið fé sem hægt er að nýta til frekari vaxtar. Þegar þetta er allt yfirstaðið með TM þá munum við svo halda áfram að breikka fjármögnun bankans,“ segir Eiríkur.
Í lok maí greindi Kvika markaðinum frá því að bankinn hefði stækkað skuldabréfaflokk í sænskum krónum um 500 milljónir sænskra króna eða sem nemur tæplega 7 milljörðum íslenskra króna. Upphaflega útgáfan nam 275 milljónum sænskra króna og er heildarstærð flokksins eftir útgáfuna því 775 milljónir sænskra króna.
Skuldabréfin, sem bera fljótandi vexti og hafa lokagjalddaga í maí 2026, voru seld á kjörum sem jafngilda 240 punkta álagi á þriggja mánaða millibankavexti í sænskum krónum.
Spurður um hvað það þýði fyrir bankann að álagið hafi lækkað og útgáfan stækkað, segir hann þetta auka samkeppnishæfni Kviku. „Þetta gerir okkur kleift að bjóða fjármálaþjónustu á betri kjörum,“ segir Eiríkur en það eru um tvö ár síðan Kvika byrjaði að ráðast í minni skuldabréfaútgáfur í sænskum og norskum krónum.
Íslendingar að glíma við auka álag
Það hefur lengi verið svo að íslensk fjármálafyrirtæki hafa þurft að sætta sig við hærra álag á skuldabréfaútgáfur erlendis, spurður um þetta „auka álag á Íslendinga“ segir Eiríkur það vissulega enn til staðar.
„Þrátt fyrir þennan góða árangur í skuldabréfaútgáfum hjá hinum íslensku bönkunum undanfarið, þá er það enn talsvert álag á kjör þeirra í samanburði við evrópska banka með sambærilegt lánshæfi. Það er enginn banki sem ég þekki til með svipað lánshæfi og þeir að borga meira en 100 punkta álag, en til samanburðar þá eru hagstæðustu kjör sem íslenskur banki hefur náð að undanförnu er 175 punktar hjá Arion,“ segir Eiríkur.
Spurður um hvað veldur þessu auka álagi, segir Eiríkur smæð Íslands spila þar hlutverk.
„Þetta er aðallega hvað við erum lítil en það er margt sem spilar inn í. Ég held við séum ekki lengur að glíma við einhverjar afleiðingar hrunsins eða neitt þvíumlíkt,“ segir Eiríkur.