Hlutabréfaverð Eimskips hækkaði um rúm 2% í rúmlega 300 milljóna króna viðskiptum í dag.
Dagslokagengi gámaflutningafélagsins var 390 krónur en gengið hefur tekið við sér á þriðja fjórðungi og hækkað um rúm 9% síðastliðinn mánuð.
Hlutabréfaverð Haga hækkaði einnig um rúm 2% í viðskiptum dagsins og var dagslokagengið 99 krónur.
Gengi Haga hefur aldrei verið hærra eftir um 27% hækkun á árinu og um 53% hækkun síðastliðið ár.
Íslenska málmleitarfélagið Amaroq Minerals greindi frá fyrstu gullframleiðslu félagsins í Grænlandi fyrir opnun markaða og rauk gengið upp í fyrstu viðskiptum.
Um tíuleytið í morgun fór gengi Amaroq í 152,5 krónur og hafði þá aldrei verið hærra. Gengi félagsins dalaði þó þegar leið á daginn og lokaði í 150,5 krónum.
Hlutabréfaverð Play lækkaði í örviðskiptum um 5% og fór gengið niður í 0,97 krónur.
Mesta veltan var með bréf Marels er gengi félagsins stóð næstum óbreytt í 1,5 milljarða króna veltu.
Úrvalsvísitalan hækkaði um 0,22% og var heildarvelta á markaði 6,4 milljarðar.
