Líftæknifyrirtækið Kerecis skorar á ríkisstjórn og Alþingi að vísa frumvarpi um breytingar á lögum um veiðigjald til viðeigandi ráðuneyta til frekari meðferðar og samráðs.
Í umsögn félagsins sem send var Alþingi í gær segir að aðkoma stjórnvalda að málinu einkennist af flýti og skorti á faglegum vinnubrögðum, með því að ráðist sé í grundvallarbreytingar á rekstrarskilyrðum heillar atvinnugreinar án nægilegrar greiningar eða umræðu.
„Óháð afstöðu hagsmunaaðila, þingmanna og annarra gagnvart frumvarpinu, efni og áhrifum þess telur Kerecis að jafn viðamikið og mikilvægt úrlausnarefni krefjist faglegri meðferðar, aukins samráðs, ítarlegri greiningar og nánari samfélagsumræðu áður en frumvarpið fær afgreiðslu þingsins. Enda eru hagsmunirnir ekki litlir, en útflutningstekjur íslensks sjávarútvegs námu tæplega 350 milljörðum króna árið 2024 eða nærri 18% íslenskra útflutningstekna,“ segir í umsögninni sem Hlynur Ólafsson, yfirlögfræðingur félagsins skrifar.
Varar við áhrifum á fjárfestingar
Kerecis bendir á að vinnubrögð sem þessi sendi fráhrindandi skilaboð til erlendra fjárfesta sem vilja byggja upp nýsköpun á Íslandi.
Slík fljótfærni við lagasetningu, án samtals, geti grafið undan trausti, aukið óstöðugleika og ógnað fjárfestingum í sjávarútvegi og tengdum greinum, þar á meðal líftækni.
„Að öðrum kosti er ein meginforsenda íslenskrar velferðar í uppnámi með tilheyrandi áhættu fyrir íslenskt samfélag,“ segir félagið.
Efnahagsleg áhrif á landsbyggð og nýsköpun
Félagið varar sérstaklega við áhrifum frumvarpsins á landsbyggðina, þar sem sjávarútvegur sé oft burðarás atvinnulífsins.
Kerecis, sem er með höfuðstöðvar á Ísafirði, bendir á að ef frumvarpið verði að lögum muni veiðigjöld helstu sjávarútvegsfyrirtækja á Vestfjörðum tvöfaldast án þess að það skili sér til heimabyggðar.
Samkvæmt Kerecis skal heldur ekki vanmeta þau beinu og óbeinu skilaboð sem vinnubrögð af þessu tagi senda þeim erlendu aðilum sem hér hafa fjárfest, eða kunna að hafa áhuga á að fjárfesta, í íslenskum atvinnuvegi og nýsköpun.
Ekki skal taka því sem sjálfsögðum hlut að erlendir fjárfestar og stórfyrirtæki kjósi að beina fjármunum og fjármagni til Íslands hvort sem það fer fram með stofnun fyrirtækja, kaupum á verðbréfum, lánveitingum eða með öðrum hætti.
Einnig er bent á að öflugur sjávarútvegur skapi hvata fyrir fjárfestingu í gæðum, tæknibúnaði, nýsköpun og sérfræðistörfum.
Slíkar keðjuverkanir hafi verið drifkraftur vaxtar Kerecis sjálfs og séu lífsnauðsynlegar til að íslensk nýsköpun haldi áfram að dafna í alþjóðlegu umhverfi.
Að lokum segir í umsögninni að frumvarpið sé ekki einungis tæknilegt skattamál heldur varði það „meiriháttar hagsmuni allra Íslendinga“ og eigi sér beina tengingu við framtíðarsýn þjóðarinnar um velsæld og verðmætasköpun.
„Að öllu framangreindu virtu skorar Kerecis á ríkisstjórn og þingmenn að vísa frumvarpinu til viðeigandi ráðuneyta til frekari meðferðar og umræðu með haghöfum í samfélaginu. Ljóst er að frumvarpið varðar meiriháttar hagsmuni allra Íslendinga og hefur beina tengingu við vegferð okkar allra í átt að aukinni velsæld hér á landi,“ segir í niðurlagi umsagnarinnar, undirritaðri af yfirlögfræðingi Kerecis, Hlyni Ólafssyni.
