Einn stærsti einka­fjár­festirinn minnkar við sig í Festi

Fjárfestingarfélagið Kjálkanes, systurfélag útgerðarfélagsins Gjögurs á Grenivík, seldi 500 þúsund hluti í Festi í síðasta mánuði, samkvæmt uppfærðum lista yfir stærstu hluthafa smásölufyrirtækisins. Salan fylgir í kjölfar meira en 40% hækkunar á hlutabréfaverði Festi í fyrra.

Miðað við meðalgengi hlutabréfa Festi í desember má ætla að söluverð Kjálkaness hafi verið í kringum 140 milljónir króna. Eignarhlutur fjárfestingarfélagsins fór úr 1,31% í 1,15% við söluna. Markaðsvirði eftirstandandi eignarhlutar Kjálkaness nemur ríflega einum milljarði króna.

Kjálkanes er einn stærsti einkafjárfestirinn í hluthafahópi Festi en smásölufyrirtækið er að langstærstum hluta í eigu lífeyrissjóða.

Í því samhengi má nefna að Hreggviður Jónsson og Þórður Már Jóhannesson, sem voru þá stærstu einkafjárfestarnir í hlutahópnum, seldu sig út úr Festi fyrir samtals um 2,6 milljarða króna í júlí síðastliðnum, skömmu í kjölfar þess að tveir af stærstu hluthaföfum Festi, LSR og Brú lífeyrissjóður, lögðust gegn tilnefningu Þórðar Más í stjórn smásölufyrirtækisins.

Á aðalfundi Festi síðasta vor dró Þórður Már framboð sitt til stjórnar baka og gagnrýndi um leið vinnubrögð ofangreindra lífeyrissjóða. Björgólfur Jóhannsson, einn af eigendum Kjálkaness, dró sömuleiðis framboð sitt í endurskoðunarnefnd til baka á aðalfundinum.

Sala Kjálkanes í Festi í síðasta mánuði er fyrsta breytingin á eignarhluti fjárfestingarfélagsins í Festi frá umræddrum aðalfundi eftir því sem Viðskiptablaðið kemst næst.

Heiðar Guðjónsson, fyrrverandi forstjóri Sýnar, var meðal hóps fjárfesta sem stóð að kaupum á hlutum Þórðar Más og Hreggviðs, m.a. í gegnum framvirka samninga, líkt og Innherji greindi frá á sínum tíma. Áætlað var að Heiðar væri kominn með yfir eitt prósents hlut í Festi.

Meðal annarra stórra einkafjárfesta í hluthafahópi Festi eru Daníel Helgason og Ingi Guðjónsson sem fengu samtals tæplega eins prósents hlut í Festi sem endurgjald í sölunni á Lyfju til Festi. Þeir áttu 15% hlut hvor í Lyfju fyrir söluna í gegnum félögin Kask og Þarabakka.