Miklar verðlækkanir urðu á mörkuðum á mánudaginn í kjölfar þess að kínverska gervigreindarfyrirtækið DeepSeek kynnti nýtt spjallmenni til leiks.
Bandaríski örflöguframleiðandinn Nvidia tapaði 17% af markaðsvirði sínu, sem jafngildir 589 milljörðum dala og er stærsta lækkun markaðsvirði fyrirtækisins frá upphafi.
Lækkunin hafði áhrif á allan tæknigeirann í Bandaríkjunum og féll Nasdaq-vísitalan, þar sem tæknifyrirtækin eru þungamiðjan, um 3,1%.
Þrátt fyrir hörð viðbrögð markaðarins hafa danskir sjóðsstjórar lítið haggast og líta jafnvel á þessa þróun sem tækifæri.
John Hydeskov, yfirmaður alþjóðlegra hlutabréfa hjá Akademikerpension, segir að um síðustu helgi hefðu fáir heyrt um Deepseek, en nú sé fyrirtækið orðið stórt nafn í tæknigeiranum.
„Þetta hefur komið eins og þruma úr heiðskíru lofti og er ferskur blær miðað við vestrænu fyrirtækin sem hingað til hafa verið talin leiðandi í gervigreind,“ segir Hydeskov.
Hann telur að markaðurinn muni þurfa tíma til að jafna sig á þeirri staðreynd að Bandaríkin séu ekki einoka í þessari tækni.
Samkvæmt viðmælendum Børsen gæti innkoma DeepSeek aukið framleiðni og eftirspurn eftir gervigreindarlausnum á heimsvísu en spjallmenni kínverska félagsins er mun ódýrari og skilvirkari en mörg önnur.
„Þetta gæti jafnvel verið skref í átt að byltingu í notkun gervigreindar,“ bætir Hydeskov við.
Philip Jagd, yfirmaður hlutabréfa hjá Sampension, tekur undir þessi sjónarmið og bendir á að þrátt fyrir verðhrunið hafi 350 af 500 fyrirtækjum í S&P 500-vísitölunni hækkað í verði á mánudaginn.
Hann telur að ef Deepseek geti veitt sömu þjónustu á lægra verði gæti það leitt til aukinnar útbreiðslu gervigreindartækni.
Slæm tíðindi fyrir tæknirisana
Það er þó ekki hægt að líta fram hjá því að Deepseek er stórt högg fyrir bandarísku tæknirisana, sem höfðu gert ráð fyrir mikilli tekjuaukningu á næstu árum með frekari þróun gervigreindar.
„Markaðurinn hefur verið sannfærður um að leiðandi fyrirtækin myndu uppskera allan ávinninginn. En ný tækni er oft mjög hreyfanleg og það er ekki sjálfgefið að sömu fyrirtæki verði alltaf í forystu,“ segir Jagd.
Alexandra Morris, fjárfestingastjóri hjá Skagen Fondene, bendir á að mikil samkeppni og nýsköpun í geiranum sýni að engin einokun sé tryggð til lengri tíma.
Otto Friedrichsen, aðstoðarframkvæmdastjóri fjárfestinga hjá Formuepleje, tekur undir þetta og telur að Deepseek gæti stuðlað að frekari dreifingu á fjárfestingum í gervigreind.
Grunsemdir um stuðning kínverska ríkisins
Þrátt fyrir hrifningu sumra sjóðsstjóra eru aðrir efins um hvernig Deepseek náði að þróa tæknina fyrir aðeins sex milljónir dala, á meðan OpenAI og Google hafa varið milljörðum dala í sína þróun.
Philip Jagd bendir á að ef Deepseek sé raunverulega byltingarkennd tækni ætti verðfall Microsoft að vera mun meira, enda hafi fyrirtækið fjárfest gríðarlega í gervigreind.
Hann bendir einnig á að kínverska ríkið gæti hafa veitt Deepseek stuðning, en ef það reynist satt gæti það haft áhrif á framtíðarstöðu fyrirtækisins á alþjóðlegum mörkuðum.
Næstu skref á markaðnum
Athygli fjárfesta mun næstu daga beinast að hollenska fyrirtækinu ASML, sem þróar búnað fyrir örgjörvaframleiðslu.
Fjárfestar munu fylgjast náið með nýjasta árshlutauppgjöri fyrirtækisins í dag, þar sem pantanabókin er sögð gefa vísbendingar um áframhaldandi vöxt.
„Það eru pöntunartölurnar sem munu skipta öllu máli í því að gefa vísbendingar um þróun markaðarins. ASML hefur áður spáð miklum vexti árið 2025, svo pantanir munu skipta sköpum,“ segir fjárfestirinn Henrik Karlsen.
Líklegt er að næstu vikur verði afdrifaríkar í gervigreindarbransanum, þar sem fjárfestar þurfa að leggja mat á hvort Deepseek sé raunveruleg ógn fyrir bandarísku tæknirisana eða aðeins tímabundið áfall í ört vaxandi tækniiðnaði.
