Hlutabréfamarkaðurinn í Bandaríkjunum hefur farið brösuglega á nýju ári og hefur S&P 500 vísitalan lækkað um 1,7% á fyrstu þremur viðskiptadögum ársins.
Samkvæmt The Wall Street Journal halda sumir fjárfestar fast í mýtuna um að gengi markaða í janúar muni endurspegla árið í heild en fyrstu dagarnir gáfu ekki mikið tilefni til bjartsýni.
Á fyrsta viðskiptadegi ársins tóku helstu hlutabréf væna dýfu og fór Nasdaq vístalan niður um 1,6% samhliða því að ávöxtunarkrafa ríkisskuldabréfa hækkaði.
Hlutabréfamarkaðurinn í Bandaríkjunum hefur farið brösuglega á nýju ári og hefur S&P 500 vísitalan lækkað um 1,7% á fyrstu þremur viðskiptadögum ársins.
Samkvæmt The Wall Street Journal halda sumir fjárfestar fast í mýtuna um að gengi markaða í janúar muni endurspegla árið í heild en fyrstu dagarnir gáfu ekki mikið tilefni til bjartsýni.
Á fyrsta viðskiptadegi ársins tóku helstu hlutabréf væna dýfu og fór Nasdaq vístalan niður um 1,6% samhliða því að ávöxtunarkrafa ríkisskuldabréfa hækkaði.
Neikvæð fylgni S&P 500 og skuldabréfa
Í lok árs í fyrra, eftir að Jerome Powell seðlabankastjóri Bandaríkjanna kynnti áform um vaxtalækkanir, tók hlutabréfamarkaðurinn verulega við sér en samkvæmt WSJ er smá titringur á mörkuðum núna um hvort fjárfestar hafi verið aðeins of fljótir á sér.
Ávöxtunarkrafa ríkisskuldabréfa til tíu ára hefur einungis þrívegis síðan 1989 lækkað jafn hratt og síðustu tveimur mánuðum ársins. Það ætti því engan að undra að krafan á ríkisskuldabréf sveiflaðist örlítið til baka.
Það sem er óvanalegt er að hlutabréf og skuldabréf hafa verið að færast í sitthvora áttina. Níutíu daga fylgni milli S&P 500 og 10 ára ríkisskuldabréfa hefur ekki verið jafn neikvæð í Bandaríkjunum á þessari öld.
Svo virðist sem fjárfestar vestanhafs ákváðu frá október og til ársloka að verðbólgan væri að hjaðna og hægt væri að njóta góðs af bæði hárri ávöxtunarkröfu og hækkunum á hlutabréfamörkuðum en S&P 500 vísitalan hækkaði um 15% á átta vikna tímabili.
Á þriðjudaginn virðist sem að tiltrú markaðarins á yfirvofandi vaxtalækkunum hafi gefið örlítið eftir og fór gengi hlutabréfa að lækka.
Hlutabréf vaxtarfyrirtækja, sem sögulega eru viðkvæmari fyrir hærri ávöxtunarkröfu ríkisskuldabréfa þar sem þau eru ekki byrjuð að skila hagnaði, áttu sinn versta dag á markaði síðan í október. Russel 1000 vaxtarvísitalan lækkaði um 1,6% á þriðjudaginn.
Sveiflur í miðri viku
Á miðvikudaginn ýttu jákvæðar hagtölur ávöxtunarkröfu tíu ára ríkisskuldabréfa yfir 4% en fleiri laus störf voru á markaði en hagfræðingar höfðu spáð samhliða því að framleiðni væri að aukast. Hærri ávöxtunarkrafa hafði aftur neikvæð áhrif á hlutabréfamarkaðinn.
Í gær byrjaði markaðurinn með sambærilegum hætti og síðastliðna tvo áratugi er hlutabréf og krafan á ríkisskuldabréf hækkuðu í sameiningu.
Þetta breyttist þó er leið á daginn og voru miklar sveiflur hjá fyrirtækjum í S&P 500 vísitölunni en stóru tæknifyrirtækin sem mynda um 30% af markaðsvirði vísitölunnar drógu heildarmyndina niður á við.
Verðbólga og vaxtaákvarðanir
Samkvæmt WSJ má ekki lesa of mikið í sveiflur gærdagsins en það gæti verið að hækkandi ávöxtunarkrafa ríkisskuldabréfa hafi valdið titringi á hlutabréfamarkaði en svo gæti líka verið töluverður söluþrýstingur frá fjárfestum sem keyptu bréf í lok árs og nutu góðs af hækkunum síðustu tvo mánuði.
Að mati blaðsins muni fregnir af verðbólgu og vaxtaákvarðanir einkenna fyrstu mánuði ársins hvort sem seðlabankinn muni lækka vexti í mars eins og fjárfestar vona eður ei.
Þetta gæti orðið vandasamir mánuðir fyrir þá sem kaupa skuldabréf til að verja sig gegn lækkunum á hlutabréfamarkaði því sveiflurnar á hlutabréfa- og skuldabréfamarkaði gætu orðið miklar næstu vikurnar.
