Rúmlega 7,7 milljarða króna velta var með hlutabréf Marels á fjórum viðskiptadögum frá miðvikudegi til mánudags eftir að John Bean Technologies birti árshlutauppgjör á þriðjudaginn í síðustu viku.
Líkt og kunnugt er hefur JBT lagt fram yfirtökutilboð í allt hlutafé Marels en kaupverðið verður greitt með 35% reiðufé og 65% hlutabréfa í JBT.
Fast viðmiðunargengi á hlutum JBT í viðskiptunum er 96,25 Bandaríkjadalir á hlut en dagslokagengi JBT á mánudaginn nam 117 dölum.
Gengi bandaríska félagsins hækkaði um tæplega 23% frá miðvikudegi til mánudags eftir að félagið birti árshlutauppgjör og fór úr rúmum 95 dölum í 117 dali.
Gengi JBT hefur lækkað örlítið síðastliðinn sólarhring en greint var frá því í morgun að FME hefði samþykkt beiðni JBT um framlengingu á gildistíma valfrjáls yfirtökutilboðs í Marel.
Dagslokagengi Marels á þriðjudaginn var 522 krónur en gengið lokaði í 580 krónum á mánudaginn.
Erlendir fjárfestingasjóðir hafa verið að kaupa bréf Íslendinga í Marel sem hugnast ekki að eiga hluti í sameinaða félaginu, vegna verðbils á gengi JBT og Marels miðað við yfirtökutilboðið.
Samkvæmt sérfræðingum á verðbréfamörkuðum eru sjóðirnir að skortselja JBT en kaupa jafn mikið á móti í Marel til að festa inn hagnað út frá mismuninum þegar tilboðið gengur í gegn.
Þá eru dæmi um það að hluthafar í Marel sem höfðu samþykkt tilboðið og óskað eftir að fá greitt í reiðufé, hafa verið að fara inn á fjárfestingasíður Arion banka, sem er með umsjón með tilboðinu, og afþakka tilboðið og selja bréfin sín á markaði þar sem hægt er að fá meira fyrir bréfin miðað við gengi mánudagsins á markaði en í tilboðinu.
Hluthafar Marels geta valið milli þess að fá:
A. Greiddar 3,60 evrur í reiðufé.
B. Afenta 0,0265 hluti í JBT og 1,26 evrur í reiðufé.
C. Fá afenta 0,0407 hluti í JBT.
Aðeins 950 milljónir evra skiptast á milli allra þeirra hluthafa sem óska eftir því að fá reiðufé.
Eftir að því hefur verið skipt niður pro rata á þá hluthafa sem eftir því óska, verður toppað upp með hlutabréfum í JBT.
Greitt verður fyrir hlutina í evrum og er fast skipti gengi evru og krónu 149,5 krónur. Miðað við fasta skiptigengið fást greiddar 538 krónur á hlut í Marel. Dagslokagengi Marels í kauphöllinni á mánudaginn var 580 krónur.
Miðað við það er hægt að fá um 8% meira fyrir hlut sinn með því að selja hann á markaði.
Sé miðað við að hluthafi breyti evrum í krónur á núverandi gengi fá hluthafar sem taka blandaða tilboðinu B um 613 krónur á hlut, miðað við dagslokagengi JBT á meðan hluthafar sem taka tilboði C og fá 0,0407 hluti í JBT fá tæplega 654 krónur fyrir sinn hlut.
Mun því vera um 5,7% hagnaðarauki á að taka tilboði B og um 12,7% á því að taka tilboði C. yfirtökutilboðið og hafa verið að kaupa bréf Íslendinga í Marel sem hugnast ekki að eiga hluti í sameinaða félaginu.
Um 8 milljarða króna veltan ein og sér bendir einnig sterklega til þess að erlendir aðilar séu að sópa upp bréfum í Marel.
Þessi frétt birtist í Viðskiptablaðinu og er miðað við dagslokagengi JBT, Marels og gjaldmiðla á mánudagskvöldið 28. október.
