Kvika banki lauk fyrir helgi sinni fyrstu skuldabréfaútgáfu í evrum, að fjárhæð 200 milljónir evra til fjögurra ára. Um tæplega 30 milljarða króna útgáfu er að ræða en bréfin bera 4,5% fasta vexti og voru seld með vaxtaálagi sem jafngildir 250 punktum ofan á millibankavexti í evrum.
Kvika er með starfsemi í Bretlandi í gegnum félagið Ortus, sem er í fullri eigu bankans og sérhæfir sig í fasteignaveðlánum. Lánabók Ortus nam um 40 milljörðum króna í lok fyrsta ársfjórðungs.
Ef Kvika nýtir fjármögnunina til að endurfjármagna Ortus gæti það skilað sér í auknum vaxtamun og hagræðingu í rekstri bankans.
Samkvæmt greiningu Akkurs gæti þessi nýja fjármögnun lækkað vaxtakostnað Kviku um 150 til 400 milljónir króna á ársgrundvelli.
Ekki liggja fyrir nákvæm kjör eldri fjármögnunar Ortus en Kvika hefur hingað til, fram á þetta ár, gefið út erlend skuldabréf með u.þ.b. 4,0% álagi á millibankavexti, aðallega í sænskum og norskum krónum. Ef gert er ráð fyrir að fjármögnun Ortus sé á svipuðum kjörum, þýðir 1,0–2,0 prósentustiga lækkun verulegan sparnað.
Til samanburðar þýðir 1,0% lækkun á vaxtakostnaði vegna GBP-lána um 160 milljónum króna lægri árlegan kostnað.
Verði útgáfan að fullu nýtt til að endurfjármagna eldri, dýrari lán, má því áætla að sparnaðurinn nemi 150 til 400 milljónum króna árlega.
Til samanburðar námu hreinar vaxtatekjur Kviku 9,7 milljörðum króna árið 2024 og spá Akkurs fyrir árið 2025 gerir ráð fyrir 11,5 milljörðum króna í hreinar vaxtatekjur.
Fyrr á þessu ári gaf Kvika einnig út skuldabréf í norskum og sænskum krónum. Þrátt fyrir að bankinn hafi áður verið með kjör í kringum 4,0–4,1% álag á millibankavexti náði hann í janúar 2025 sínu besta samkomulagi hingað til, með aðeins 2% álagi.
Útistandandi útgáfur í þessum gjaldmiðlum námu um 23,6 milljörðum króna í lok fyrsta ársfjórðungs og ef sambærileg kjör haldast áfram gæti árlegur sparnaður numið allt að 500 milljónum króna.
Töluverð umframeftirspurn
Útgáfan fór fram undir umsjón BofA Securities, J.P. Morgan og Morgan Stanley. Kvika hélt yfir 50 fjárfestafundi í aðdraganda útboðsins og samkvæmt Innherja fylltist pantanabókin á innan við hálftíma.
Að lokum nam heildareftirspurnin yfir 350 milljónum evra. Vegna öflugrar þátttöku fjárfesta var vaxtaálagið lækkað úr 270 í 250 punkta áður en lokað var fyrir bókun.
Samkvæmt JP Morgan voru 80% skuldabréfanna keypt af fjárfestum frá Bretlandi, þar af 73% af vogunarsjóðum.
Jákvæð viðbrögð á markaði
Þó að vaxtaálag Kviku hafi verið um 100 punktum hærra en hjá Arion banka og Íslandsbanka, sem fengu um 140 punkta álag í sambærilegum evruútgáfum fyrr á árinu, telja greinendur það eðlilegt enda um frumútgáfu í evrum að ræða samhliða því að efnahagsreikningur Kviku er minni í sniðum.
JP Morgan benti jafnframt á að áhugi fjárfesta sýni að markaðurinn sé móttækilegur fyrir nýjum, minni íslenskum útgefendum ef útgáfurnar eru vel undirbúnar og faglega framkvæmdar.
Fjárfestar hafa tekið vel í evruútgáfu Kviku og hækkaði hlutabréfaverð bankans um 4% í viðskiptum að andvirði 408 milljóna króna í morgun. Gengi Kviku stendur í 16 krónum á hlut þegar þetta er skrifað.
