Eftir tvö ár af mikilli hækkun á hlutabréfamörkuðum í Bandaríkjunum eru sífellt fleiri einstaklingar farnir að stíga varlegar til jarðar, samkvæmt The Wall Street Journal.
Fjárfestar, bæði yngri og eldri, eru nú að minnka vægi hlutabréfa í eignasöfnum sínum, ekki vegna hræðslu við lækkun á morgun, heldur til að vernda þann ávinning sem hefur myndast þrátt fyrir óvissu síðustu mánaða.
Þeir sem sáu verðmæti eigna sinna sveiflast um tugi prósenta í kjölfar tollaaðgerða Donalds Trump Bandaríkjaforseta í apríl hafa nýtt viðsnúning markaðarins til að draga úr áhættu og færa hluta eigna í reiðufé, skuldabréf eða erlenda markaði.„Ég hugsaði: Af hverju er ég í þessu? Ég vil ekki sitja eftir með of mikla áhættu þegar næsta niðursveifla skellur á,“
„Af hverju er ég í þessu?“
Paul Bachman, 58 ára verkfræðingur, hefur lækkað vægi hlutabréfa í sínu eignasafni úr 60% í tæplega 50% og hyggst halda áfram að minnka hlutfallið ef markaðurinn heldur áfram að hækka.
„Ég hugsaði: Af hverju er ég í þessu? Ég vil ekki sitja eftir með of mikla áhættu þegar næsta niðursveifla skellur á,“ segir Bachman við WSJ. „Ef markaðurinn heldur áfram að styrkjast, þá nýti ég tækifærið til að lækka áhættu og tryggja stöðuna.“
Fjárfestar eins og Bachman kjósa að bregðast við óvissu og sveiflum með því að endurskipuleggja eignasafn sitt fremur en að reyna að tímasetja markaðinn. Þeir velja stöðugleika og fjárhagslegt jafnvægi umfram mögulega hámarksávöxtun.
Kólnun eftir kaupæði
Samkvæmt nýrri skýrslu frá JPMorgan Chase minnkaði kaupáhugi einstaklinga á hlutabréfum umtalsvert í maí.
Almennir fjárfestar keyptu fyrir 23 milljarða dala, um 17 milljörðum minna en í apríl. Að auki seldi þessi hópur nettó fyrir um 400 milljónir dala í síðustu viku.
Þrátt fyrir að einstakir fjárfestar séu enn virkir á markaði bendir þróunin til aukinnar varfærni.
Fjármálaráðgjafar vara yfirleitt við því að reyna að „tímasetja markaðinn“, en margir fjárfestar segjast einfaldlega vilja draga úr ofáhættu eftir nokkur góð ár.
Brett Koeppel, stofnandi ráðgjafarfyrirtækisins Eudaimonia Wealth í New York, segir að um helmingur viðskiptavina hans hafi rætt um aðlögun á eignasöfnum eftir markaðslækkun ársins 2025.
„Fólk sem fann fyrir óöryggi í apríl hefur nú tækifæri til að endurskoða stefnuna. Þetta er eins og að fá annað tækifæri,“ segir Koeppel.
Hann bætir við að ef fjárfestar hafi íhugað aðgerðir á meðan lækkunarferlið var í gangi gæti það bent til þess að þeir hafi tekið meiri áhættu en þeim líður vel með. Þá sé skynsamlegt að aðlaga áhættustigið að raunverulegum þolmörkum.
Aðrir fjárfestar, sem annaðhvort eru nálægt eftirlaunum eða telja bandaríska markaði of hátt verðlagða, hafa fært sig yfir í alþjóðleg hlutabréf.
Juliet Bashore, 68 ára kvikmyndagerðarkona, horfði á lífeyrissparnað sinn rýrna hratt í apríl þegar markaðurinn brást við tollatillögum.
Hún hafði þegar byrjað að minnka hlutabréfaeign sína vegna væntanlegra starfsloka en ákvað að selja um þriðjung þess sem eftir stóð og setja fjármunina í reiðufé.
„Ég gerði það sem ráðgjafar segja mér að forðast og ég sé ekki eftir því,“ segir Bashore. „Það virtist einfaldlega réttur tímapunktur til að festa stöðuna.
