Verðbólga í Bandaríkjunum er að hjaðna en samkvæmt nýbirtum tölum í gær mældist verðbólga á ársgrundvelli um 3% í júní.
Fjárfestar tvíefldust í trú sinni um vaxtalækkun í september og urðu töluverðar hreyfingar á markaði í gær.
Samkvæmt The Wall Street Journal var gríðarleg velta með minni og meðalstór fyrirtæki og hækkaði Russel 2000 vísitalan um 3,6%, en vísitalan hefur ekki hækkað jafn mikið á einum degi síðan í nóvember í fyrra.
Á sama tíma var töluverður söluþrýstingur á stóru tæknifyrirtækjunum. Markaðsvirði sjö stærstu tæknifyrirtækjanna lækkaði um 597,5 milljarða í gær sem samsvarar um 82 þúsund milljörðum íslenskra króna.
Markaðsvirði tæknifyrirtækjanna hefur ekki lækkað jafn mikið á einum viðskiptadegi síðan í febrúar 2022, samkvæmt Dow Jones Market Data.
Hlutabréfaverð Nvidia lækkaði um 5,6% á meðan gengi Meta, móðurfélags Facebook, lækkaði um um 4,1%. Hlutabréfaverð Alphabet, móðurfélags Google, Amazon, Apple og Microsoft, lækkaði um meira en 2%.
Gengi Tesla lækkaði síðan um 8,4% eftir að hafa hækkað 11 viðskiptadaga í röð. S&P 500 vísitalan lækkaði um 0,9% á meðan Nasdaq vísitalan, þar sem tæknifyrirtækin eru þungamiðjan, féll um 2%.
Fjárfestar virðast vera að veðja stórt á að vaxtalækkunin komi minni og meðalstórum fyrirtækjum vel en bilið milli hækkunar Russel 2000 vísitölunnar og lækkunar á Nasdaq vísitölunni hefur ekki verið meira á einum viðskiptadegi síðan 1986.
Ávöxtunarkrafa ríkisskuldabréfa til tíu ára fór úr 4,280% niður í 4,192% í gær.
