Geir Kristinsson, eigandi GK Fjármála, bendir þeim fjölmörgu Íslendingum sem keyptu í Íslandsbanka nýverið á ágætis ráð, vilji þeir halda áfram að fjárfesta í hlutabréfum.
Yfir 31.000 einstaklingar tóku þátt í útboði ríkisins á hlutum í Íslandsbanka í A-bókinni á genginu 106,56 og margir hverjir eru væntanlega virkir fjárfestar en aðrir að kaupa hlutabréf í fyrsta sinn.
Í pistli á Linkedin bendir Geir þeim á að það gæti verið hentugt að setja hlutabréfaeignir inn í sérfélag ef fólk hefur hug á frekari fjárfestingum.
Ef einstaklingur keypti fyrir tvær milljónir í útboðinu, stofnar einkahlutafélag og framselur því bréfin á sama gengi, gæti hann síðar selt þau með 10% hagnaði en tekið út upprunalega fjárfestingu sem skuld við eiganda, án skattgreiðslu.
Hagnaðurinn, í þessu tilviki 200 þúsund krónur, myndi áfram liggja eftir í félaginu til frekari fjárfestinga.
Til þess að þetta gangi upp þarf m.a. að sækja um LEI-kóða og opna vörslureikning í nafni félagsins.
LEI-kóðar (Legal Entity Identifier) eru áskildir fyrir alla lögaðila sem taka þátt í fjármálaviðskiptum reglulega og kaupa hlutabréf, verðbréf og önnur bréf.
„Dæmi: Einstaklingur keypti fyrir 2 milljónir í útboðinu.
1️⃣ Stofnar ehf.
2️⃣ Sækir um LEI-kóða og opnar vörslureikning.
3️⃣ Framselur bréfin á sama gengi (106,56).
4️⃣ Félagið selur síðar bréfin með 10% hagnaði.
5️⃣ Eigandinn tekur út 2 milljónir skattfrjálst (skuld við eiganda).
6️⃣ Hagnaðurinn, 200 þús, er eftir í félaginu til áframhaldandi fjárfestinga
Þetta passar ekkert endilega fyrir alla en ágætt að vita af möguleikanum,“ skrifar Geir.
