Ellert Hlöðversson fjármálastjóri Íslandsbanka segir að þó að innleiðing nýrra fjármálareglna CRR III muni hafa áhrif hér heima sé mikilvægt að hafa í huga að fjölmargir þættir koma að verðlagningu og lánakjörum einstaklinga.
„Augljósu áhrifin eru sú að eiginfjárbinding húsnæðislána er að verða áhættunæmari en áður. Við erum að koma út úr heimi sem við getum kallað „handbókar-heiminn“ þar sem skipti voðalega litlu máli hversu áhættusamt lánið var út frá veðþekjunni og hvað þyrfti að binda mikið eigið fé, og færa okkur yfir í heim þar sem minna eigið fé er bundið eftir því sem lánið er betur tryggt,“ segir Ellert.
Líkt og Viðskiptablaðið hefur fjallað um mun innleiðing nýrra fjármálareglna Evrópusambandsins, svokallaðra Capital Requirements Regulation III (CRR III), leiða til umtalsverðra breytinga á útlánaskilyrðum hér á landi.
„Það er síðan bara samkeppnismál hvernig menn færa það yfir í verðlagningu,“ segir Ellert og bætir við að Íslandsbanki sé byrjaður að undirbúa vöruframboð sem tekur mið af þessum breytingum.
„Við munum markaðssetja þær vörur þegar réttar aðstæður til þess verða,“ segir Ellert.
Ellert segir þó mikilvægt að hafa í huga að þó að eiginfjárbinding sé vissulega stór þáttur í verðlagningu sé það þó ekki eini þátturinn. „Þetta hefur til að mynda ekki áhrif á fjármögnunarkostnað bankans,“ segir Ellert.
Hann segir, líkt og fram hefur komið í gögnum frá bankanum, að eins og staðan er núna sé búist við því að áhættugrunnur Íslandsbanka dragist saman um svona 4-5% eftir innleiðingu reglnanna en það gæti þó alveg breyst.
„Í spurningarskjölum Evrópsku bankaeftirlitsstofnunarinnar (EBA) eru enn þá þúsundir spurninga sem eru ósvaraðar og gætu hreyft þessa hluti til. Það er erfitt að benda á eina tölu og segja að þetta sé hinn heilagi sannleikur.“
„Eins og þetta liggur fyrir núna sýnist okkur að þetta geti haft þessi áhrif. Áhættugrunnur bankans er norðan við þúsund milljarða þannig að þetta er lækkun á áhættugrunni um 40 til 50 milljarða sem þýðir að við erum að losa hlutafé sem er kannski svona 8 til 9 milljarðar,“ segir Ellert.
Í CRR III er lagt upp með að hægt verði að lækka áhættuvog lánveitinga til framkvæmda úr 150% niður í 100% ef verktaki leggur fram verulegt eigið fé.
Samkvæmt drögum Evrópsku bankaeftirlitsstofnunarinnar (EBA) ætti þetta „verulega eigið fé“ að nema 35% af söluverðmæti en lokaniðurstaðan hefur ekki verið tekin um hlutfallið. Ellert segir að hérlendis hafi verið miðað við um 25% til 30% af framkvæmdarkostnaði og því um töluverða breytingu að ræða.
„Það er alveg ljóst að miðað við umræðurnar í kringum EBA ákvörðunina þá endar þetta þannig, að til þess að fá 100% áhættuvog þá verður eignafjárkrafan hærri heldur en gengur og gerist í framkvæmdarlánum hérlendis. Upphaflega var talað um 35% af markaðsverðmæti. Hingað til höfum við horft á framkvæmdarkostnaðinn,“ segir Ellert.
„Það er alveg ljóst að miðað við umræðurnar í kringum EBA ákvörðunina þá endar þetta þannig, að til þess að fá 100% áhættuvog þá verður eignafjárkrafan hærri heldur en gengur og gerist í framkvæmdarlánum hérlendis. Upphaflega var talað um 35% af markaðsverðmæti. Hingað til höfum við horft á framkvæmdarkostnaðinn,“ segir Ellert.
„Þannig að það er þó miklu minna en hlutfallið af endanlegu markaðsverðmæti. Breytingin er þá sú að lán undir fyrstu stoð fengu þá 150% áhættuvog í staðinn fyrir 100%. Það þarf að huga að það var áður viðbótareiginfjárkrafa undir annarri stoð. Þannig að þetta er ekki alveg að fara úr 100% í 150%. Þessi lán fara síðan úr annarri stoð yfir í pillar 1 og það verða önnur áhrif af því líka,“ segir Ellert.
