Íslandsbanki var miðpunktur hlutabréfaviðskipta í Kauphöllinni í maímánuði og fór fram metfjöldi viðskipta með bréf bankans. Alls voru skráð 5.123 viðskipti með bréf Íslandsbanka á tímabilinu, sem nemur tæplega 40% allra viðskipta með einstök félög í mánuðinum.
Samkvæmt nýbirtu viðskiptayfirliti Nasdaq Iceland fyrir maí 2025 voru samtals 13.739 hlutabréfaviðskipti skráð á markaðnum, sem jafngildir 687 viðskiptum á dag að meðaltali. Fjöldinn jókst um 14,7% frá apríl og meira en tvöfaldaðist samanborið við maí í fyrra.
Viðskipti með bréf Íslandsbanka námu alls 121 milljarði króna í maí, sem er langmesta veltan með hlutabréf eins félags í mánuðinum. Hafa ber í huga að ríkið afhenti hlutabréf að andvirði 90,5 milljarða króna til almennings og fagfjárfesta í mánuðinum.
Marksvirði jókst um 600 milljarða
Arion banki var með næstmestu veltuna sem nam 12 milljörðum króna í 1.259 viðskiptum.
Kvika banki fylgdi þar á eftir með veltu upp á 9,8 milljarða og samtals 746 viðskipti með bréf félagsins.
Velta með bréf Alvotech nam 6,2 milljörðum í mánuðinum.
Í lok maí voru 33 félög skráð á Aðalmarkað og Nasdaq First North-vaxtarmarkaðinn á Íslandi. Samanlagt markaðsvirði þeirra nam 2.648 milljörðum króna, samanborið við 2.020 milljarða í apríl.
Úrvalsvísitalan OMXI15 hækkaði um 10,7% í maí og stóð í 2.703 stigum við lok mánaðarins. Heildarvísitalan OMXIPI hækkaði um 13,3% og fór í 2.248 stig.
Heildarvelta með hlutabréf í maí nam 184 milljörðum króna eða 9.207 milljónum á dag – 161% meira en í apríl og 180% aukning frá sama mánuði í fyrra.
Á skuldabréfamarkaði var Íslandsbanki með 25,8% markaðshlutdeild í veltu. Þar á eftir komu Arion banki með 19,4% og Landsbankinn með 19,38%.
Heildarviðskipti með skuldabréf námu 167,3 milljörðum króna í maí, sem er svipað og í apríl, en um 16% meira en í sama mánuði í fyrra.
Verðtryggðar og óverðtryggðar vísitölur hækkuðu lítillega og aðalvísitala skuldabréfa (NOMXIBB) fór upp um 0,3%.
