Fjármögnun á Innviðafélagi Íslands, fyrsta sérhæfða lánsfjármögnunarsjóði fyrir innviði hér á landi, lauk á dögunum. Sjóðurinn, sem er í rekstri REC sjóða, er fjármagnaður af lífeyrissjóðum og eru fjórir af sex stærstu lífeyrissjóðum landsins meðal fjárfesta.
Hugmyndin á bak við Innviðafélag Íslands er að auk eigin lánsfjármögnunar verði hann samstarfsvettvangur fyrir lánsfjármögnun innviða sem allir lífeyrissjóðir hafi aðgang að. Þannig er gert ráð fyrir meðfjárfestingum lífeyrissjóða á þeim vettvangi.
Fjárfestingargeta samstarfsvettvangsins, þ.e. sjóðurinn ásamt meðfjárfestingum samkvæmt áskriftarsamningi við lífeyrissjóði, er að lágmarki 23 milljarðar króna.
Sigurður Kristinn Egilsson, framkvæmdastjóri Innviðafélags Íslands, er vongóður um að sjóðurinn geti stuðlað að hraðari framgangi innviðaverkefna hér á landi.
„Við teljum að það hafi vantað þennan millilið sem þekkir hvernig verkefnin þurfi að vera sett upp til að liðka fyrir aðkomu lífeyrissjóða og mæta þeirra kröfum. Með tilkomu félagsins er orðinn til vettvangur fyrir þá aðila sem þarfnast lánsfjármögnunar fyrir innviðaverkefni, hvort sem það eru sveitarfélög, ríki eða einkaaðilar.“
Vongóður um hraðari uppbyggingu
Talsvert hefur verið rætt um aukna aðkomu lífeyrissjóða að fjármögnun innviðaverkefna á undanförnum árum og hafa forsvarsmenn nokkurra sjóða reglulega lýst yfir áhuga á slíkum fjárfestingum. Hins vegar er óhætt að segja að lítið hafi gerst í þessum málaflokki á síðustu árum.
Sigurður Kristinn telur tækifæri til að leysa mikinn kraft úr læðingi þegar kemur að innviðaframkvæmdum, t.d. með virkara samtali milli hins opinbera og stofnanafjárfesta. Eins sé hægt að horfa til fyrirmynda erlendis við fyrirkomulag samstarfsverkefna milli opinberra aðila og einkaaðila (PPP-verkefna), líkt og í Færeyjum. Sé vandað til verka ætti að vera hægt að koma þessum málum í góðan farveg.
Fréttin er hluti af lengri umfjöllun um Innviðafélag Íslands í Viðskiptablaðinu sem kom út í gær.
