Björgólfur Thor Björgólfsson hefur sent frá sér yfirlýsingu um umfjöllun RÚV um njósnir fyrirtækisins PPP árið 2012 á einstaklingum sem komu að hópmálsókn gegn honum.
„Sá hluti málsins sem tengist mér og sneri að fullyrðingum um meintar njósnir á mínum vegum eru einfaldlega rangar. Upptökur sem sýndar voru í þættinum sá ég fyrst þann 30. apríl — á sama tíma og aðrir landsmenn,“ segir Björgólfur.
Hann segir það hafa komið sér í opna skjöldu að sjá í þætti Kveiks hversu langt starfsmenn PPP gengu í tengslum við þessar rannsóknir. Upptökur hafi aldrei verið afhentar sér né starfsfólki hans „og voru því aldrei nýttar af okkur á nokkurn hátt“.
„Það kom ekkert út úr þessu verkefni og engin frekari verkkaup urðu af okkar hálfu. Mér þykir miður að persónuupplýsingum fólks hafi verið safnað og setið hafi verið um heimili þess — slík vinnubrögð fordæmi ég og hefði aldrei samþykkt ef mér hefði verið þau ljós.“
Greiddi 8 milljónir, ekki 33
Björgólfur segir að árið 2012 hafi fulltrúar PPP (Pars Per Pars) boðið sig fram að fyrra bragði til að afla upplýsinga um aðila sem þá voru að undirbúa hópmálsókn gegn sér. Starfsemi PPP, sem hafði þá starfað fyrir opinbera aðila og lögmannsstofur, hafi verið kynnt sem lögleg upplýsingaöflun.
„Nokkrar staðreyndavillur komu fram í þætti Kveiks. Til að mynda voru, samkvæmt bókhaldsgögnum, greiddar 8 milljónir króna fyrir verkefnið, en ekki 33 milljónir eins og haldið hefur verið fram.“
Björgólfur segist hafa kosið að svara ekki strax ásökunum sem á sig voru bornar í þætti Kveiks þar sem langur tími sé liðinn frá umræddum atburðum og sannreyna þurfti upplýsingar sem komu fram.
„Í grunninn snýr málið að meintum gagnaleka á viðkvæmum upplýsingum í fórum stjórnvalda. Það voru aðrir en ég sem höndluðu með þau gögn og þurfa að svara fyrir það.“
Björgólfur fagnar í yfirlýsingunni að dómsmálaráðherra hafi beint sjónum sínum að rannsókn á því hvernig trúnaðarupplýsingum í hirslum sérstaks saksóknara var lekið og hverjir keyptu þau gögn. „Ég hef ekkert með það lekamál að gera.“
Yfirlýsing Björgólfs í heild sinni:
„Ég kaus að svara ekki strax ásökunum sem á mig voru bornar í sjónvarpsþættinum Kveik sem birtist á Rúv undir lok síðasta mánaðar. Ástæðan er að langur tími er liðinn frá umræddum atburðum og sannreyna þurfti upplýsingar sem komu fram. Í grunninn snýr málið að meintum gagnaleka á viðkvæmum upplýsingum í fórum stjórnvalda. Það voru aðrir en ég sem höndluðu með þau gögn og þurfa að svara fyrir það.
Sá hluti málsins sem tengist mér og sneri að fullyrðingum um meintar njósnir á mínum vegum eru einfaldlega rangar. Upptökur sem sýndar voru í þættinum sá ég fyrst þann 30. apríl — á sama tíma og aðrir landsmenn.
Árið 2012 buðu fulltrúar PPP (Pars Per Pars) sig fram að fyrra bragði til að afla upplýsinga um aðila sem þá voru að undirbúa hópmálsókn gegn mér. PPP hafði þá starfað fyrir opinbera aðila og lögmannsstofur og starfsemin var kynnt sem lögleg upplýsingaöflun. Nokkrar staðreyndavillur komu fram í þætti Kveiks. Til að mynda voru, samkvæmt bókhaldsgögnum, greiddar 8 milljónir króna fyrir verkefnið, en ekki 33 milljónir eins og haldið hefur verið fram.
Það kom mér í opna skjöldu að sjá í Kveiksþættinum hversu langt starfsmenn PPP gengu í tengslum við þessar rannsóknir. Upptökur voru aldrei afhentar mér né starfsfólki mínu og voru því aldrei nýttar af okkur á nokkurn hátt. Það kom ekkert út úr þessu verkefni og engin frekari verkkaup urðu af okkar hálfu.
Mér þykir miður að persónuupplýsingum fólks hafi verið safnað og setið hafi verið um heimili þess — slík vinnubrögð fordæmi ég og hefði aldrei samþykkt ef mér hefði verið þau ljós.
Ég fagna því að dómsmálaráðherra hafi beint sjónum sínum að rannsókn á því hvernig trúnaðarupplýsingum í hirslum sérstaks saksóknara var lekið og hverjir keyptu þau gögn. Ég hef ekkert með það lekamál að gera.“
— Björgólfur Thor Björgólfsson
