Þátttaka í útboði ríkisins á hlutabréfum í Íslandsbanka var gríðarleg en alls fengu 31.000 einstaklingar úthlutun í tilboðsbók A þar sem 86,9 milljarðar króna af 90,6 milljarða heildarsölu andvirðis gengu kaupum og sölum.
Hámarksúthlutun í bók A var 19.999.927 krónur og engin skerðing var gerð á tilboðum almennings í þeirri bók.
Nýbirt gögn frá fjármála- og efnahagsráðuneytinu sýna að meðal kaupenda voru fjölmargir forstjórar skráðra félaga í Kauphöll Íslands og nokkrir fengu hámarksúthlutun.
Forstjórarnir sem keyptu mest
Alls fengu fjórir hámarksúthlutun, 19.999.927 krónur, en þeir voru Finnur Oddsson forstjóri Haga, Ægir Páll Friðbertsson forstjóri ISI, Árni Sigurðsson, aðstoðarforstjóri JBT Marel, og Andri Þór Guðmundsson forstjóri Ölgerðarinnar.
Þar á eftir kom Jón Þór Gunnarsson, forstjóri Kaldalóns, sem keypti fyrir 14.999.918 krónur.
Hermann Björnsson, forstjóri Sjóvár, keypti fyrir 3.999.836 krónur og Hreiðar Már Hermannsson, forstjóri Eikar fasteignafélags, keypti fyrir 3.196.800 krónur.
Vilhelm Már Þorsteinsson, forstjóri Eimskips, fékk úthlutað fyrir 2.499.898 krónum á meðan Ásta Sigríður Fjeldsted, forstjóri Festi, og Bogi Nils Bogason, forstjóri Icelandair Group, fengu bæði úthlutað fyrir 1.999.918 krónum.
María Björk Einarsdóttir, forstjóri Símans, keypti fyrir sömu upphæð á meðan Herdís Dröfn Fjeldsted, forstjóri Sýnar, keypti fyrir 999.959 krónur.
Alls fengu 1.529 einstaklingar hámarksúthlutun í bók A í útboðinu en líkt og Viðskiptablaðið hefur fjallað um var nokkuð um að efnameiri einstaklingar hefðu safnað kennitölum í útboðinu og reynt þannig að tryggja sér stærri hlut á afslætti.
