FTSE 250 vísitalan, sem mælir gengi 250 stærstu fyrirtækja Bretlands, lokaði 17.032 stigum í Kauphöllinni í Lundúnum í dag. Vísitalan tapaði 180 stigum og lækkaði um rúmt prósent sem færir árslækkun vísitölunnar í 11%.
Vísitalan er oft talin betri mælikvarði á efnahag Bretlands en FTSE 100 þar sem fleiri meðalstór fyrirtæki eru í vísitölunni. Ef litið er fram hjá dýfu vísitölunnar í kringum kórónuveirufaraldurinn hefur hún ekki verið lægri í sjö ár.
Á sama tíma féll FTSE 100 um 97 stig í dag og lækkaði 1,3% í 7.402 stig. FTSE 100 vísitalan hefur ekki átt verri viku síðan um miðjan ágúst en vísitalan lækkaði um 2,5% þessa vikuna sem er fimmta mesta lækkun á árinu.
Bob Savage, markaðssérfræðingur hjá BNY Mellon, segir í samtali við viðskiptablað The Guardian að fjölmargir þættir höfðu áhrif á gengi skráðra félaga í vikunni.
„Hætta á frekari vaxtahækkunum í Bandaríkjunum, ótti við Ísrael og Hamas-átökin, skortur á leiðtoga í fulltrúadeild Bandaríkjaþings, hærra olíuverð, hærra gullverð,“ nefnir Savage.
Námuvinnslufyrirtækið Anglo American leiddi lækkanir meðal FTSE 100 fyrirtækja og fór gengið niður um 4,2%.
