Endanlegt kostnaðarmat við nýjan miðlægan greiðsluinnvið Seðlabanka Íslands fyrir greiðslubeiðnir liggur ekki fyrir að svo stöddu. Verið er að vinna úr tillögum átta aðila að útfærslu og kostnaði en þróunaraðili hefur ekki verið valinn. Þá er unnið er að viðskiptalíkani, skemareglum og fleiri atriðum sem varða rekstur og innleiðingu.
Þetta kemur fram í svari Seðlabankans við fyrirspurn Viðskiptablaðins.
Seðlabankinn hefur undanfarin ár lagt áherslu á viðnámsþrótt innlendrar greiðslumiðlunar. Í því skyni hefur bankinn leitt vinnu við innleiðingu miðlægs innviðar fyrir greiðslubeiðnir sem verður undir forræði Seðlabankans og hýstur innanlands.
Fram kom í máli Ásgeirs Jónssonar seðlabankastjóra og Tómasar Brynjólfssonar, varaseðlabankastjóra fjármálastöðugleika, á kynningarfundi fjármálastöðugleikanefndar í byrjun mánaðar að bankinn vonaðist til að búið væri að koma innviðinum á koppinn fyrir jól.
Ekkert kom þó fram um kostnaðinn en spurður út í þann lið sagði Tómas á fundi fjármálastöðugleikanefndar að hann hafi verið metinn og væri að þeirra mati hóflegur.
„[Kostnaðurinn] er að engum hætti jafnmikill og sumir vilja láta vera,“ sagði Tómas. Eins og áður segir kveðst Seðlabankinn ekki geta gefið upp hver kostnaðurinn er.
Fréttin birtist fyrst í Viðskiptablaðinu.
