Hlutabréfaverð líftæknilyfjafélagsins Alvotech hækkaði um tæp 10% í um 1,1 milljarða króna viðskiptum í dag. Gengi Alvotech hefur nú hækkað um 25,5% frá því að félagið skilaði árshlutauppgjöri eftir lokun markaða á miðvikudaginn.
Samhliða færði Alvotech afkomuspá sína fyrir yfirstandandi ár upp og tilkynnti um að stefnt væri að skráningu á Nasdaq-markaðinn í Svíþjóð þann 19. maí næstkomandi.
Hlutabréf í JBT Marel hækkuðu um rúm 4% í viðskiptum dagsins. Dagslokagengi félagsins var 14.500 krónur, sem nemur um 21% hækkun síðastliðinn mánuð.
Hlutabréfaverð Oculis hækkaði um 2,5% í viðskiptum dagsins en félagið birti árshlutauppgjör í gærkvöldi.
Dagslokagengi Oculis var 2.470 krónur á hlut. Gengi félagsins hefur hækkað um rúm 19% síðastliðinn mánuð.
Úrvalsísitalan OMXI15 hækkaði um 2% í viðskiptum dagsins. Vísitalan hefur hækkað um rúm 8% síðastliðinn mánuð en lækkað um rúm 11% það sem af er ári.
Heildarvelta á markaði var 3,3 milljarðar.
