Hlutabréfaverð Alvotech lækkaði annan daginn í röð sem þýðir að þrátt fyrir miklar hækkanir á mánudaginn hefur gengi félagsins lækkað um rúmt 1% síðustu fimm viðskiptadaga.
Gengi félagsins hefur nú lækkað um 11% síðustu tvo viðskiptadaga og var dagslokagengið 2.190 krónur. Gengið hefur þó hækkað um 38% það sem af er ári en er einungis 8% hærra en fyrir ári síðan.
Hlutabréf í Eimskip leiddu hækkanir í Kauphöllinni í dag fór gengið upp um tæp 3% í 250 milljón króna veltu en gengi Eimskip hefur verið á mikilli niðurleið síðustu daga. Samkvæmt ársuppgjöri dróst hagnaður félagsins saman um 36% á milli ára en töluverðar áskoranir eru fram undan í skipaflutningum.
Hlutabréfaverð Icelandair tók einnig lítillega við sér eftir miklar lækkanir síðustu mánuði en gengi félagsins hækkaði um 2% eftir um 20% lækkun síðastliðinn mánuð. Dagslokagengi flugfélagsins var 1,18 krónur.
Úrvalsvísitalan OMXI 15 lækkaði um 0,6% og var heildarvelta á markaði 5,4 milljarðar.
