Hlutabréfaverð málmleitarfélagsins Amaroq Minerals hefur lækkað um 21% síðastliðna tvo mánuði eða síðan félagið hélt fjárfestadag í höfuðstöðvum Landsbankans 13. júní síðastliðinn.
Gengi félagsins hreyfðist lítið í viðskiptum dagsins en hefur lækkað um tæp 8% síðastliðinn mánuð. Gengi Amaroq, sem fór á aðalmarkað í fyrra, hefur þó hækkað um 25% síðastliðið ár þrátt fyrir lækkanir síðustu mánaða.
Hlutabréfaverð félagsins hækkaði um rúm 25% á fyrstu þremur mánuðum ársins og náði hámarki í 150,5 krónum á hlut þann 7. mars. Gengið hefur síðan þá lækkað um tæp 34% en dagslokagengið var 99,8 krónur í dag.
Gengi Kviku lækkar í aðdraganda uppgjörs
Von er á árshlutauppgjöri annars ársfjórðungs frá Amaroq fyrir opnun markaða á morgun.
Hampiðjan leiddi hækkanir í markaði í dag er gengi félagsins fór upp um tæp 2% í 155 milljón króna viðskiptum.
Mesta veltan var með bréf Arion banka en gengi bankans hreyfðist lítið í hálfs milljarðs viðskiptum. Velta með bréf Kviku banka nam 427 milljónum er gengi bankans féll um 1,5%.
Kvika, líkt og Amaroq, birti árshlutauppgjör eftir lokun markaða á morgun. Dagslokagengi bankans var 15,05 krónur.
Úrvalsvísitalan OMXI15 hækkaði um 0,13% og var heildarvelta á markaði 2,4 milljarðar.
