Hlutabréfaverð málmleitarfélagsins Amaroq Minerals leiddi hækkanir á aðalmarkaði í dag er gengi félagsins fór upp um 2% í 374 milljóna veltu.
Dagslokagengi Amaroq var 192 krónur en gengið fór í sitt hæsta gildi um miðjan janúarmánuð þegar dagslokagengið var 209 krónur.
Hlutabréfaverð Oculis hækkaði einnig í viðskiptum dagsins og lokaði í 3.100 krónum eftir rúma 1% hækkun í 342 milljóna viðskiptum. Gengi Oculis hefur hækkað um 30% það sem af er ári.
Gengi Icelandair hækkaði sömuleiðis um 1% í 210 milljón króna viðskiptum og var dagslokagengi flugfélagsins 1,44 krónur á hlut.
Hlutabréfaverð Iceland Seafood International leiddi lækkanir er gengið fór niður um tæp 2% í örviðskiptum. Gengi Hampiðjunnar lækkaði um rúmt 1% í 112 milljón króna viðskiptum.
Úrvalsvísitalan hækkaði um 0,08% og lokaði í 2.911,61 stigum. Heildarvelta á markaði nam 4,9 milljörðum króna.
