Hlutabréfaverð Eimskips hækkaði um 3,5% í um 772 milljón króna viðskiptum í dag.
Dagslokagengi gámaflutningafélagsins var 452 og hefur ekki verið hærra í rúmt ár en gengið hefur hækkað um tæp 18% á árinu.
Gengi Festi hækkaði um tæp 2% í milljarða króna viðskiptum en von er á ársuppgjöri frá félaginu í byrjun febrúar.
Hlutabréfaverð Festi rauk upp eftir uppgjör þriðja ársfjórðungs í haust er félagið birti sitt fyrsta uppgjör eftir samrunann við Lyfju.
Gengi Festi hefur hækkað um tæp 48% síðastliðið ár og var dagslokagengið 289 krónur.
Hlutabréfaverð málmleitarfélagsins Amaroq leiddi lækkanir á aðalmarkaði er gengi félagsins fór niður um 3% í 232 milljóna viðskiptum.
Gengi Amaroq hefur verið í hæstu hæðum síðustu vikur eftir að félagið framleiddi sinn fyrsta gullmola á Grænlandi undir lok síðasta árs.
Úrvalsvísitalan hækkaði um 0,07% og var heildarvelta á markaði 7,7 milljarðar.
