Hlutabréfaverð Icelandair hefur lækkað um 3,5% í tæplega 95 milljón króna viðskiptum í dag. Gengi flugfélagsins stendur í 0,99 krónum þegar þetta er skrifað en gengið fór síðast undir eina krónu í apríl á þessu ári.
Á sama tíma hefur gengi Play lækkað um rúmt 1,6 % í örviðskiptum og stendur gengið í 0,9 krónum á hlut.
Verð á Brent hráolíu, sem er m.a. notuð í flugvélaeldsneyti, hefur hækkað skarpt undanfarnar vikur í kjölfar vaxandi spennu í Mið-Austurlöndum, einkum eftir loftárásir Bandaríkjanna á kjarnorkumannvirki í Íran.
Þotueldsneyti gæti farið í 880 dali á tonn
Eftir að Bandaríkin gerðu loftárásir á kjarnorkumannvirki í Íran rauk verð á Brent hráolíu upp í 81,4 dali á tunnu.
Verðið á Brent hráolíu hefur ekki verið hærra í fimm mánuði eftir um 14% hækkun frá því að Ísrael varpaði sprengjum á Íran.
Greiningardeild fjárfestingarbankans Goldman Sachs telur líklegt að Brent gæti hækkað allt upp í 110 dali á tunnu ef flæði hráolíu um Hormússund skerðist verulega.
Ef Brent fer í 110 dali á tunnu, sem er líkleg sviðsmynd ef ástandið í Íran versnar, má áætla að verð á þotueldsneyti (Jet A-1) fari yfir 880 dali á tonn.
Þetta er vel umfram þau verð sem íslensku flugfélögin hafa tryggt sér í eldsneytissamningum sínum fyrir árið 2025.
Raunverulegt verð getur þó verið aðeins hærra eða lægra eftir crack spread, flutningskostnaði og söluskilmálum.
Icelandair gerir allt að eins árs samninga
Þrátt fyrir að þetta sé tiltekin sviðsmynd þá telur Goldman Sachs líkur á röskun í flutningum „mjög raunhæfar“ og vitnar í forspár frá Polymarket sem sýna að líkur á lokun sundsins séu metnar um 52 prósent.
Samkvæmt árshlutauppgjöri Icelandair var eldsneytiskostnaður félagsins á fyrsta ársfjórðungi 2025 samtals 62,1 milljón Bandaríkjadala, þar af námu bein eldsneytiskaup 55,2 milljónum dala og kolefnisgjöld 5 milljónum.
Félagið fékk þó jákvæð áhrif frá eldsneytisvörnum upp á 1,85 milljónir dala.
Á fyrsta ársfjórðungi 2025 var áhrifaverð á eldsneyti um 827 dali á tonn.
Samkvæmt ársuppgjöri Icelandair fyrir árið 2024 notar flugfélagið eldsneytisjöfnunarsamninga (t.d. afleiður og framvirka samninga) til að verja sig gegn sveiflum í hráolíuverði. Félagið gerir samninga sem ná allt að 12 mánuði fram í tímann og vernda hluta af áætlaðri eldsneytisnotkun.
Í lok árs 2024 hafði félagið tryggt 30% af notkun fyrstu 3 mánuði árs 2025 með samningum sem miðast við verðbil á Brent hráolíu á bilinu 750–850 USD/tonn af Jet A-1 eldsneyti
Um 40% eldsneytis varið á öðrum fjórðungi
Samkvæmt fjárfestakynningu Play fyrir árið 2024 hefur félagið tryggt sér hluta eldsneytisþarfar með afleiðusamningum. Á fyrsta ársfjórðungi 2025 er verndað verð 787 USD/tonn, á öðrum ársfjórðungi 763 USD/tonn og á þeim þriðja 738 USD/tonn.
Hlutfall varinna samninga lækkar eftir því sem horft er lengra fram á tímann. Um 60% í 1–3 mánuði, 40% í 4–6 mánuði og 30% í 7–12 mánuði.
Þetta gefur Play sveigjanleika til að bregðast við verðþróun en þýðir jafnframt að hluti eldsneytis þarf að vera keyptur á markaðsverði.
Ef raunverð hækkar í þá átt sem Goldman Sachs áætlar, en Play heldur hluta af neyslu sinni tryggðum á 738–763 USD/tonn, þannig er verulegur hluti eldsneytis varinn.
Ef sviðsmynd Goldman Sachs raungerist og Jet A-1 eldsneyti fer yfir 880 dali á tonn þá greiða Play og Icelandair um 50–150 dalum lægra verð fyrir þann hluta sem þau hafa tryggt.
Það dregur úr sveiflum en nær aðeins til hluta heildarnotkunar.
Samkvæmt nýjustu uppgjörum var einingarkostnaður (CASK) án eldsneytis 7,0 cent hjá Icelandair og 4,43 cent hjá Play.
Ef olíuverð hækkar mikið gæti það kallað á hækkanir á fargjöldum, skerta þjónustu eða minnkandi afkomu, sérstaklega ef samkeppni um verð og flugleiðir herðist samhliða því.
