Hlutabréfaverð Heima hefur hækkað um 11% síðastliðinn mánuð en gengi fasteignafélagsins fór upp um 2% í um 700 milljón króna viðskiptum í dag.
Dagslokagengi Heima var 24,7 krónur og hefur það ekki verið hærra síðan um miðjan marsmánuð.
Rúmur mánuður er síðan Heimar, áður Reginn, dró yfirtökutilboð sitt í Eik til baka en Halldór Benjamín Þorbergsson forstjóri Heima sagði í kjölfarið í tilkynningu að félagið myndi fara aðrar leiðir að sama marki.
Halldór sagði félagið væri að byggja upp langtímastefnu sem myndi fela í sér að selja eignir og endurfjárfesta í fasteignum innan skilgreindra kjarna, einkum í nýbyggingum.
Hlutabréfaverð Eimskips hækkaði einnig um 2% í viðskiptum dagsins en gengi gámaflutningafélagsins hefur hækkað um rúm 7% síðastliðinn mánuð.
Gengi Eimskips hefur lækkað um 24% á árinu en lág gámaflutningsverð hafa meðal annars haft neikvæð áhrif á afkomuna í ár.
Ef marka má afkomuspá danska gámaflutningarisans Maersk er þó byrjað að birta til í gámaflutningum í Norður-Atlantshafi.
Hlutabréf í Sýn lækkuðu mest í viðskiptum dagsins er gengi félagsins fór niður um rúm 2% í lítilli veltu. Hlutabréfaverð Sýnar hefur nú lækkað um 28% og var dagslokagengið 34,2 krónur en gengið hefur ekki verið lægra í tæp fjögur ár.
Úrvalsvísitalan OMXI15 lækkaði um 0,11%. Heildarvelta á markaði var 5,1 milljarður.