Hlutabréfaverð Icelandair hefur hækkað um rúm 4% í tæplega 150 milljón króna viðskiptum í morgun en flugfélagið birti farþegatölur eftir lokun markaða í gær.
Gengi flugfélagsins hefur nú hækkað um tæplega 14% síðastliðinn mánuð. Þegar þetta er skrifað stendur gengið í 1,48 krónum á hlut en dagslokagengi flugfélagsins var síðast svo hátt í janúar í fyrra.
Samkvæmt kauphallartilkynningu félagsins í gær flutti Icelandair 4,7 milljónir farþega árið 2024, 9% fleiri en árið á undan og sló þar með nýtt farþegamet.
Farþegar í desember voru 312 þúsund, 18% fleiri en á sama tíma í fyrra. Þar af voru 28% á leið til Íslands, 19% frá Íslandi, 47% ferðuðust um Ísland og 6% innan Íslands.
Sætanýting í desember var 82,6%, sem er met og aukning um 10,2 prósentustig frá fyrra ári.
„Eftirspurn er sterk á öllum mörkuðum en munurinn á milli ára skýrist einnig af því að eldgos hafði neikvæð áhrif á sætanýtingu í fyrra,“ segir í tilkynningu Icelandair.
„Við höldum áfram að sjá jákvæðar tölur í farþegaleiðakerfinu og er mjög ánægjulegt að sjá nýtt met í sætanýtingu í desember. Þrátt fyrir að veðurfar á Íslandi hafi haft umtalsverð áhrif á stundvísi okkar í mánuðinum var stundvísi yfir árið mjög góð og jókst hún um sex prósentustig samanborið við árið í fyrra,“ sagði Bogi Nils Bogason forstjóri Icelandair í tilkynningunni.
