Hlutabréfaverð Iceland Seafood International hefur hækkað um 4% í viðskiptum dagsins en félagið birtir árshlutauppgjör eftir lokun markaða í dag.
Viðsnúningur varð á rekstri félagsins á fjórða ársfjórðungi í fyrra. Félagið tapaði 3 milljörðum króna á fyrstu níu mánuðum ársins 2023 en skilaði síðan hagnaði upp á 403 þúsund evrur, eða um 60 milljónir króna, á fjórða ársfjórðungi.
Var það í fyrsta sinn frá þriðja ársfjórðungi 2022 sem félagið skilar hagnaði eftir skatta.
ISI skilaði hagnaði aftur á fyrsta ársfjórðungi 2024 eftir um 2,2 milljóna evra tap á sama tímabili í fyrra en félagið skilaði aftur tapi á öðrum ársfjórðungi.
Á fyrri árshelmingi tapaði ISI um 730 þúsund evrum eða 109 milljónum króna, eftir skatta á fyrri árshelmingi.
Eftir uppgjör annars ársfjórðungs sagði Ægir Páll Friðbertsson, forstjóri ISI, að áfram væri óvissa í rekstrarumhverfi félagsins og að stjórnendur gerður ráð fyrir að svo yrði áfram.
Hátt vaxtastig væri að gera mörgum rekstraraðilum í iðnaðinum erfitt fyrir og almennt væri búist við krefjandi rekstraraðstæðum og viðvarandi verðbólgu.
Seðlabanki Íslands lækkaði þó vexti um 50 punkta í morgun og uppfærði verðbólguspá sína sem gerir nú ráð fyrir meiri hjöðnun en upphaflega var spáð í ágúst þegar ISI birti árshlutauppgjör fyrri árshelmings.
Sem fyrr segir er von á uppgjöri frá félaginu seinna í dag.
