Hlutabréfaverð Íslandsbanka hækkaði um 2,5% í um 845 milljón króna viðskiptum í dag og var dagslokagengi bankans 124 krónur.
Dagslokagengi bankans hefur ekki verið hærra á árinu en leita þarf aftur til febrúar í fyrra til að finna hærra gengi á hlutabréfum bankans.
Hagnaður af rekstri Íslandsbanka á þriðja ársfjórðungi nam 7,3 milljörðum króna samkvæmt nýbirtum ársreikningi og var arðsemi eigin fjár 13,2% á ársgrundvelli.
Arðsemi bankans var vel yfir spám greinenda en meðaltal sjö greininga áætlaði arðsemi bankans um 10,8% á þriðja ársfjóðungi.
Eigið fé Íslandsbanka nam 223,4 milljörðum króna í lok ársfjórðungsins, samanborið við 224,7 milljarða króna í lok árs 2023.
Fjárfestar voru komnir í startholurnar
Fjármálaráðuneytið greindi nýverið frá því að útboði ríkisins á helmingshlut sínum í bankanum yrði slegið á frest en til stóð að ljúka útboðinu fyrir áramót en fjárlög næsta árs gera ráð fyrir um allt að 45 milljarða króna söluhagnaði af útboðinu.
Samkvæmt heimildum Viðskiptablaðsins nemur kostnaður við undirbúning útboðsins tugum milljóna króna og fyrirséð að efna verður til slíks kostnaðar að nýju ef útboðið hefði ekki klárast fyrir lok þessa ársfjórðungs.
Ríkið á um 850 milljón hluti í Íslandsbanka sem samsvarar um 42,5% hlut. Miðað við dagslokagengi bankans er hlutur ríkisins metinn á 105,4 milljarða króna.
Samkvæmt sérfræðingum á skuldabréfamarkaði mun ríkið að öllum líkindum mæta fjárlagatinu með sölu á ríkisvíxlum fremur en útgáfu á óverðtryggðum eða verðtryggðum ríkisskuldabréfum.
Uppgjör flugfélaganna vonbrigði
Flugfélagið Play leiddi lækkanir á aðalmarkaði í dag er gengi félagsins fór niður um 13% í 16 milljón króna viðskiptum. Dagslokagengi Play nam 0,82 krónum og hefur aldrei verið lægra.
Flugfélagið birti árshlutareikning þriðja ársfjórðungs eftir lokun markaða í gær en félagið hagnaðist um 500 milljónir króna á fjórðungnum sem er um þriðjungslækkun milli ára.
Lausafjárstaða félagsins var 39,8 milljónir bandaríkjadala við lok ársfjórðungsins og hefur því aukist um 0,6 milljónir bandaríkjadala á milli ára.
Einar Örn Ólafsson, forstjóri Play, sagði á fjárfestafundi í gær að lausafjárstaða félagsins væri betri en í fyrra en fram undan eru miklar breytingar á viðskiptalíkani flugfélagsins.
Breytingin felur í sér að áfangastöðum í Norður-Ameríku og Norður-Evrópu verður fækkað frá og með miðju næsta ári.
Á hinn bóginn verður áætlun félagsins til Suður-Evrópu efld. Í tilkynningu flugfélagsins er bent á að bein flug til áfangastaða félagsins í Suður-Evrópu hafi verið arðbær frá upphafi.
Meðfram nýju viðskiptalíkani hefur Play hafið umsóknarferli um flugrekstrarleyfi á Möltu til að greiða fyrir fjölbreyttari starfsemi á vegum félagsins. Reiknar félagið með því að nýja flugrekstrarleyfið verði í höfn næsta vor.
Þannig er stefnt að því að fyrsta vél Play sem færð verður yfir á nýtt flugrekstrarleyfi verði staðsett á Tenerife og muni þaðan meðal annars fljúga til Keflavíkur og Akureyrar.
Hagnaðarsamdráttur hjá Icelandair
Hlutabréfaverð Icelandair lækkaði einnig í um 200 milljón króna veltu er gengi félagsins fór niður um tæp 3%.
Icelandair birtir árshlutauppgjör í byrjun vikunnar en afkoma félagsins á þriðja ársfjórðungi lækkaði á milli ára.
Icelandair hagnaðist um 69,2 milljónir dala eða um 9,5 milljarða króna á þriðja ársfjórðungi. Hagnaður félagsins á þriðja fjórðungi dróst saman um 18% frá sama tímabili í fyrra.
Tekjur félagsins á fjórðungnum drógust saman um 1,2% milli ára og námu 553 milljónum dala eða um 76 milljörðum króna. EBIT-afkoma flugfélagsins lækkaði um fjórðung milli ára og nam 11,4 milljörðum króna.
Bogi Nils Bogason, forstjóri Icelandair, sló þó í jákvæðan tón í uppgjörinu og sagðist eiga von á „verulegum rekstrarbata“ á næstunni.
Amaroq hækkað um 47% á rúmum mánuði
Hlutabréfaverð Amaroq hækkaði einnig lítillega í viðskiptum dagsins en gengi málmleitarfélagsins hefur verið á miklu skriði síðustu daga.
Eldur Ólafsson, forstjóri og stofnandi Amaroq, sagði í síðasta uppgjöri félagsins að von væri á að gullframleiðsla félagsins muni hefjast á fjórða ársfjórðungi.
Hlutabréfaverð Amaroq hefur frá miðjum september hækkað um 47% og farið úr 100 krónum í 147 krónur.
Milljarðavelta með bréf Marels
Langmesta veltan var með gengi Marels í dag en gengi félagsins lækkaði um 1% í 2 milljarða króna viðskiptum. Hátt í 6 milljarða króna velta hefur verið með bréf Marels síðustu þrjá daga frá því að John Bean Technologies birti árshlutauppgjör síðastliðinn þriðjudag.
Úrvalsvísitalan hækkaði um 0,03% í viðskiptum dagsins en vísitalan hefur hækkað um rúm 8% síðastliðinn mánuð og þar af 5% síðastliðna viku.
Lokagildi vísitölunnar var 2.629,24 og hefur hún ekki verið hærri á árinu. Heildarvelta í Kauphöllinni í dag var 6 milljarðar.
