Dagslokagengi JPMorgan Chase, stærsta skráða banka í heimi, í gær var 172,08 dalir og hefur gengi bankans aldrei verið hærra.
Hlutabréf í bankanum höfðu áður náð sínu hæsta gildi í desember 2021 þegar dagslokagengið fór í 171,78 dali.
Hlutabréf bankans hafa hækkað um 27% síðastliðið ár samkvæmt The Wall Street Journal.
Í október var greint frá því að Jamie Dimon, forstjóri JPMorgan Chase, hyggist selja um eina milljón hluti í bankanum á þessu ári. Um er að ræða fyrsta skiptið sem hann minnkar við hlut sinn í fjárfestingarbankanum frá því að hann hóf þar störf fyrir rúmum tveimur áratugum síðan.
Dimon og fjölskylda hans eiga í dag 8,6 milljónir hluti í bankanum og munu því eiga um 7,6 milljónir hluti eftir söluna.
Miðað við dagslokagengi gærdagsins fengi Jamie Dimon um 23 milljarða íslenskra króna fyrir 1 milljón hluti en ekki hefur verið tilkynnt um hvenær á árinu hann hyggst losa hlutina.
Í kauphallartilkynningu í haust sagði JPMorgan að Dimon hyggist selja í bankanum út af fjárhagslegri áhættudreifingu og skattalegum ástæðum.
Bankinn sagði forstjórann áfram telja horfur bankans mjög sterkar „og eignarhlutur hans í fyrirtækinu verður áfram mjög umgangsmikill“.
JPMorgan mun birta árshlutauppgjör þann 12. janúar næstkomandi.
