Hlutabréfaverð fasteignafélagsins Kaldalóns lækkaði um rúm 5% í 217 milljón króna viðskiptum í dag.
Gengi félagsins hefur nú lækkað um 13,5% síðastliðinn mánuð. Dagslokagengið var 22,2 krónur en stóð í 25,2 krónum í byrjun júnímánaðar.
Hlutabréfaverð Símans lækkaði um 4,5% í 13 milljón króna viðskiptum og var dagslokagengi fjarskiptafélagsins 12,8 krónur.
Gengi Símans hefur ekki verið lægra síðan í nóvember í fyrra eftir um 8% lækkun síðastliðinn mánuð.
Hlutabréfaverð Sjóvá lækkaði um tæp 4% í viðskiptum dagsins og lokaði í 45,4 krónum á hlut.
Gengi tryggingafélagsins hefur lækkað um 7% síðastliðinn mánuð en þó hækkað um 30% síðastliðið ár.
Viðsnúningur varð á gengi Alvotech í dag er hlutabréfaverð félagsins fór upp um 2,8% í 256 milljón króna veltu.
Hlutabréfaverð Alvotech hefur lækkað síðustu átta viðskiptadaga en gengið tók við sér í morgun.
Dagslokagengi Alvotech var 1.100 krónur.
Gengi JBT Marel hækkaði einnig í viðskiptum dagsins. Dagslokagengi félagsins var 14.700 krónur á hlut eftir um 2% hækkun í 96 milljón króna viðskiptum.
Úrvalsvísitalan OMXI 15 lækkaði um 0,83% og var heildarvelta á markaði 4 milljarðar.
