Hlutabréfaverð Marels hækkaði um 6,5% í 3,1 milljarða króna viðskiptum í dag en JBT, sem hefur gert yfirtökutilboð í Marel birti árshlutauppgjör í gær.
Stærstu einstöku viðskiptin áttu sér stað um hálf tvöleytið í dag er tæplega 490 þúsund hlutir í Marel skiptust um hendur á genginu 540,2 krónur. Um tæplega 265 milljóna króna viðskipti var að ræða. Önnur tæplega 250 milljón króna viðskipti áttu sér stað tveim mínútum seinna.
Gengi JBT vel yfir viðmiðunargengi
Í árshlutauppgjöri JBT kom fram að tekjur félagsins námu 454 milljónum Bandaríkjadala á þriðja ársfjórðungi sem samsvarar um 63 milljörðum króna á gengi dagsins.
Um er að ræða um 12% tekjuaukningu frá þriðja ársfjórðungi 2023 en hagnaður fyrir fjármagnsliði og afskriftir (EBITDA) jókst um 23% og nam 82 milljónum dala.
Gengi JBT hefur hækkað um tæplega 13% í viðskiptum dagsins og stendur í 107,6 dölum um þessar mundir. Í yfirtökutilboði félagsins á hlutum í Marel er miðað við að viðmiðunargengi á hvern hlut í JBT sé 96,25 Bandaríkjadalir.
Grænar tölur og mikil velta
Úrvalsvísitalan OMXI15 hækkaði um 2,74% í viðskiptum dagsins og var lokagildi hennar 2.616,33 stig. Lokagildi vísitölunnar hefur ekki verið hærra síðan í byrjun febrúarmánaðar.
Heildarvelta nam 12,1 milljörðum.
Nær öll félög á aðalmarkaði hækkuðu í viðskiptum dagsins. Hlutabréfaverð Skaga, Haga og Ölgerðarinnar hækkaði um meira en 5% hvor.
Um hálfs milljarðs króna velta var með bréf Haga í dag og hefur gengi félagsins aldrei verið hærra.
Hlutabréfaverð Alvotech hækkaði um 3,5% í 1,4 milljarða króna viðskiptum.
Icelandair var eina félagið á aðalmarkaði sem lækkaði svo marktækt væri er gengi flugfélagsins fór niður um 3,5% í 250 milljón króna viðskiptum.
Heildarvelta nam 12,1 milljörðum.