Hlutabréf líftæknifyrirtækisins Oculis, sem tekin voru til viðskipta í íslensku Kauphöllinni í lok apríl, hafa lækkað um 6% frá skráningu.
Félagið lauk 59 milljóna dala hlutafjáraukningu, sem samsvarar 8,2 milljörðum íslenskra króna, um miðjan aprílmánuð.
Meðal hluthafa sem komu nýir inn voru íslenskir stofnanafjárfestar en Oculis fór á markað í Bandaríkjunum fyrir rúmu ári síðan gegnum sérstakt yfirtökufélag (e. SPAC) og eru bréf félagsins tvískráð.
Oculis birti í vor jákvæðar niðurstöður úr tveimur klínískum rannsóknum á OCS-01, augndropum sem byggja á Optirech® tækni félagins. OCS-01 augndroparnir bættu verulega sjón sjúklinga með sjónhimnubjúg í sykursýki, sem annars er meðhöndlað með sprautuástungu á auga.
Gert er ráð fyrir að síðar á þessu ári muni niðurstöður liggja fyrir úr nokkrum klínískum rannsóknum, m.a. fyrir lok annars ársfjórðungs á OCS-02 (TNF-hamlara) líftækni-augndropum Oculis við alvarlegum augnþurrki, sem og á notkun OCS-05 til meðhöndlunar á sjóntaugarbólgu á fjórða ársfjórðungi.
Gengi Icelandair var ekki lægra í fjögur ár
Hlutabréfaverð Icelandair lokaði í 0,88 krónum en lægsta dagslokagengi í sögu félagsins var 0,87 krónur þann 5. október 2020.
Gengi flugfélagsins fór niður um 3,5% í um 78 milljón króna veltu í dag.
Skömmu fyrir kórónuveirufaraldurinn stóð gengi flugfélagsins í 8,820 krónum og hefur gengið lækkað um 99% síðan þá.
Mesta veltan var með bréf Marels en gengi félagsins hreyfðist lítið í 469 milljón króna viðskiptum.
Úrvalsvísitalan OMXI15 lækkaði um 0,49% og var heildarvelta á markaði 2,5 milljarðar.
