Hlutabréfaverð flugfélagsins Play hefur hækkað um 11% í örviðskiptum í dag og stendur gengið í 0,83 krónum á hlut þegar þetta er skrifað.
Rúm vika er síðan að flugfélagið birti ársuppgjör sitt en þar kom fram að félagið skilaði 66 milljóna dala tapi á liðnu ári, sem nemur ríflega 9,1 milljarði króna.
Til samanburðar tapaði félagið um 35 milljónum dala árið áður, sem nemur 4,8 milljörðum króna. Hefur félagið í heildina tapað 171,4 milljónum dala frá stofnun þess, sem nemur 23,3 milljörðum króna.
Í viðtali við Viðskiptablaðið segir Hans Jørgen Elnæs, norskur greinandi og ráðgjafi á flugmarkaði, að félagið muni að öllum líkindum þurfa að fara í hlutafjárútboð á fyrsta ársfjórðungi.
„Helsta áskorun Play er að einingakostnaður (CASK) er enn þá talsvert meiri en einingatekjur (RASK). Þetta verður að breytast á árinu 2025 til að félagið skili hagnaði eða a.m.k. minnki tapið milli ára,“ segir Hans.
Hægt er að lesa umfjöllun Viðskiptablaðsins um íslensku flugfélögin hér.
