Virði eignarhluts Eyris Invest í Marel dróst saman um 19,5 milljarða króna í viðskiptum á aðalmarkaði Kauphallar í gær. Líkt og Viðskiptablaðið greindi frá lækkaði verð á bréfum félagsins um 17,56% og markaðsvirði þess því úr 452 milljörðum króna niður í 381 milljarð.

Sjá einnig
Þriðji versti dagurinn frá hruni

Eyrir Invest er stærsti hluthafi Marels með 24,7% eignarhlut. Stærstu einstöku hluthafar Eyris eru þeir feðgar, Þórður Magnússon og Árni Oddur Þórðarson með 20,7% og 18,1% hlut hvor. Virði eignarhluta Þórðar í gegnum Eyri rýrnaði því um 4.041 milljón króna og hlutur Árna um 3.533 milljónir. Aðrir stórir hluthafar í Eyri Invest eru Landsbankinn, Lífeyrissjóður starfsmanna ríkisins (LSR) og Lífeyrissjóður verzlunarmanna (LIVE).

Tíu stærstu hluthafar Eyris Invest og virðisrýrnun í bréfum Marel

Hluthafi Eignarhlutur Virðisrýrnun í m. kr.
Þórður Magnússon 20,7% -4.041
Árni Oddur Þórðarson 18,1% -3.533
Landsbankinn 14,20% -2.772
LSR, B-deild 11,60% -2.265
LIVE 11,30% -2.206
Aneta Limited, Malta 3,40% -664
Birta lífeyrissjóður 3,10% -605
Snæból ehf. 3,00% -586
Noruz hf. 3,00% -586
LSR, A-deild 2,60% -508
Taflan sýnir breytingu á gangverði hluta Marel eftir viðskipti í Kauphöll 4.5.2023, í gegnum eignarhald hluthafa í Eyri Invest

Aðalfundur Eyris verður haldinn þann 11. maí næstkomandi en líkt og Viðskiptablaðið greindi frá fyrir skemmstu hyggst Þórður láta af stjórn félagsins eftir 23 ár í brúnni. Eyrir tapaði 80 milljörðum króna í fyrra, en gangvirði eignarhluta Eyris í Marel lækkaði um 46% á árinu.

Þrátt fyrir mikla lækkun á hlutabréfum Marel í gær hafa bréfin hækkað um ríflega 1% frá áramótum.

Sjá einnig
Þórður Magnússon hættir hjá Eyri Invest