Góa hefur keypt allan tækjabúnað hinnar íslensku súkkulaðiframleiðslu Omnom og mun hefja framleiðslu undir nafninu.
Starfsmenn Omnom hafa fengið boð um að halda áfram vinnu við framleiðsluna undir merkjum Góu, sem tekur við rekstrinum formlega 1. mars.
„Við erum mjög ánægðir með þessa niðurstöðu. Með þessu náðum við að halda framleiðslunni áfram á Íslandi og þetta frábæra fólk sem hefur unnið í framleiðslunni með okkur mun geta gert það áfram. Tækifærin verða stærri og við lítum björtum augum til framtíðarinnar,“ segir Óskar Þórðarson, einn stofnenda Omnom.
Helgi Vilhjálmsson, eigandi Góu, segist spenntur fyrir framtíðinni og telur samrunann skapa spennandi möguleika.
„Fyrir okkur er þetta mjög spennandi og býður upp á skemmtilega möguleika. Við höfum horft til þess sem Omnom hefur verið að gera í talsverðan tíma og erum ánægð með að geta stuðlað að því að unnt sé að halda því ævintýri áfram,“ segir Helgi.
Omnom var stofnað árið 2013 og hefur vakið athygli fyrir hágæða súkkulaðiframleiðslu og skapandi bragðsamsetningar. Fyrirtækið sérhæfir sig í notkun hágæða kakóbauna frá öllum heimshornum og hefur fengið alþjóðlega viðurkenningu fyrir vörur sínar.
Góa var stofnuð árið 1968 og hefur verið rekin af Helga Vilhjálmssyni og fjölskyldu hans. Fyrirtækið hefur framleitt vinsælar sælgætistegundir eins og Hraun, Æði og Florída. Góa er einn stærsti sælgætisframleiðandi Íslands og hefur alla framleiðslu sína á landi.
