Dow Jones vísitalan fór yfir 40.000 stig í fyrsta sinn í sögunni í gær samhliða heilbrigðum hagnaði fyrirtækja, hjaðnandi verðbólgu og mikilli atvinnuþátttöku vestanhafs.
Samkvæmt The Wall Street Journal hafa fjárfestar vestanhafs sjaldan haft það jafn gott og nú.
Hlutabréf fyrirtækja í Dow Jones vísitölunni eru á skriði, tæknifyrirtækin eru að gera það gott, Bitcoin og aðrar rafmyntir eru að hækka samhliða því að gull og aðrir eðalmálmar eru í hæstu hæðum.
Áhættufælnir fjárfestar eru einnig í ágætum málum þar sem ávöxtunarkrafa ríkisskuldabréfa er um 5% í Bandaríkjunum samhliða því að kröfur á skuldabréfum í ruslflokki eru enn háar.
„Hlutabréf í vaxtafyrirtækjum eru enn frekar hátt verðlögð en restinn af markaðinum er það ekki,“ segir Ben Inker, forstjóri fjárfestingafélagsins GMO, í samtali við WSJ.
Að hans mati hefur fjárfestingaumhverfið ekki verið jafn öflugt í 24 ár.
Ef síðustu sex mánuðir eru skoðaðir má sjá töluverðar hækkanir. Verð á kopar hefur hækkað um 31,7%, hlutabréf í tæknifyrirtækjum hafa hækkað um 20,2% og verð á gulli hefur hækkað 20%.
Russel 2000 vísitalan sem fylgir minni og meðalstórum fyrirtækjum í Bandaríkjunum hefur hækkað um 18,2% á meðan S&P 500 hefur hækkað um 17,5%.
Dow Jones vísitalan hefur hækkað um 14,1% síðastliðna sex mánuði og er sem fyrr segir í sögulegum hæðum.
