Á fundi stjórnar Samtaka fyrirtækja í sjávarútvegi (SFS), sem haldinn var í dag, 17. júní, var samþykkt ný skipan í embætti og stjórnareiningar samtakanna í samræmi við samþykktir. Samþykkt var að Gunnþór Ingvason, varaformaður samtakanna, forstjóri Síldarvinnslunnar hf., taki við formennsku í samtökunum fram að næsta aðalfundi samtakanna. Þetta kemur fram í tilkynningu frá stjórn SFS.
Guðmundur Kristjánsson, forstjóri Brims, tilkynnti um afsögn sína sem formaður SFS í gær. Hann sagði ástæðuna vera þá að áherslur hans í starfi samtakanna njóti ekki stuðnings framkvæmdastjóra né heldur félaga hans í forystu samtakanna. Þar af leiðandi taldi hann best fyrir samtökin að hann segði sig úr forystu þeirra.
Á fundinum í dag var samþykkt að Ægir Páll Friðbertsson, ritari samtakanna, forstjóri Iceland Seafood ehf., taki við varaformennsku í samtökunum og að Anna Guðmundsdóttir, fjármálastjóri Gjögurs hf., taki við embætti ritara samtakanna. Einnig var samþykkt að Daði Hjálmarsson, framkvæmdastjóri KG fiskverkunar hf., taki sæti í framkvæmdaráði samtakanna. Stjórn samþykkti einnig kjör Friðriks Friðrikssonar, framkvæmdastjóra mannauðssviðs Brims hf., í stjórn samtakanna.
„Stjórn Samtaka fyrirtækja í sjávarútvegi þakkar Guðmundi Kristjánssyni, fráfarandi formanni, fyrir samstarfið í forystusveit samtakanna. Framlag Guðmundar til sjávarútvegs og samtakanna í gegnum tíðina er mikið. Stjórnin harmar að leiðir skilji á þessum tímapunkti en Guðmundur verður áfram þátttakandi í starfi samtakanna sem öflugur félagsmaður.
Samtakamáttur og samstaða um starfsskilyrði íslensks sjávarútvegs er og verður leiðin fram á við til aukinnar verðmætasköpunar. Stjórn samtakanna óskar Guðmundi velfarnaðar fram veginn við áframhaldandi uppbyggingu sjávarútvegs á Íslandi,“ segir í tilkynningu stjórnar SFS.
