Hæstiréttur Íslands hefur fallist á málskotsbeiðni Vinnslustöðvarinnar gegn íslenska ríkinu í svokölluðu makrílmáli.
Héraðsdómur og Landsréttur staðfestu skaðabótaskyldu ríkisins gagnvart Vinnslustöðinni og dótturfélaginu Huginn vegna úthlutunar aflaheimilda á árunum 2011 til 2018.
Með dómi héraðsdóms var niðurstaða matsgerðar lögð til grundvallar um fjárhæð bóta með þeim hætti að bótafjárhæðin var vegna óvissuþátta miðuð við 30% lægri fjárhæð.
Landsréttur lagði niðurstöðu matsgerðarinnar til grundvallar með sama hætti og héraðsdómur en miðaði við meðalhagnað eingöngu.
Landsréttur taldi að kröfur vegna áranna 2011 og 2012 hefðu verið fyrndar þegar Vinnslustöðin hf. höfðaði fyrra mál sitt gegn íslenska ríkinu.
Af þessum sökum voru bætur til Vinnslustöðvarinnar lækkaðar um 245,7 milljónir króna og verða 269,5 milljónir króna í stað 515,2 milljóna.
Dómur Héraðsdóms Reykjavíkur í máli Hugins er hins vegar staðfestur af Landsrétti og nema bætur til þess fyrirtækis 467 milljónum.
Samtals nema bæturnar þannig 736,5 milljónum króna sem ofan á reiknast vextir.
„Vinnslustöðin hf. byggir á því að sú aðferð sem Landsréttur hafi notað til að ákveða bætur sé röng og með niðurstöðunni hafi verið virt að vettugi sérfræðileg niðurstaða dómkvaddra manna án þess að gagnaðilinn íslenska ríkið hefði leitast við að hnekkja forsendum matsgerðarinnar með yfirmati,“ segir í ákvörðun Hæstaréttar.
Þá segir Vinnslustöðin að niðurstaða Landsréttar um fyrningu bótakrafna vegna áranna 2011 og 2012 hafi verið bersýnilega röng og að ákvörðun Landsréttar um vexti um hluta hinnar dæmdu kröfu bersýnilega ranga.
Aðilar hafi gert sátt og í henni hafi tjónstímabilið verið tiltekið, það er árin 2011 til 2014.
Hæstiréttur telur að dómarinn muni hafa fordæmisgildi um ákvörðun fjártjóns og því var áfrýjunarleyfi samþykkt.
