Fjárfestingafélagið Skel hagnaðist um 2,1 milljarð á fyrstu sex mánuðum ársins. Mun það vera meira en helmingi minna en á sama tímabili í fyrra þegar fjárfestingafélagið hagnaðist um 4,9 milljarða. Þetta kemur fram í nýbirtu árshlutauppgjöri. Ástæðan fyrir minni hagnaði milli ára er að á sama tímabili í fyrra voru bókfærðar einskiptistekjur upp á sex milljarða vegna sölu fasteigna.
Eignir félagsins námu 42,1 milljarði króna á meðan eigið fé nam 34,9 milljörðum sem samsvarar 18,1 krónu á hvern útgefinn hlut. Eiginfjárhlutfall var 83,1%.
Fjárfestingatekjur félagsins drógust einnig saman á milli ára og námu 2.424 milljónum í ár í samanburði við 6.849 milljónir á fyrri árshelming síðasta árs.
Arðsemi eigin fjár á ársgrundvelli var 12,5% á fyrri árshelmingi í samanburði við 30% á tímabilinu árið 2022. Hagnaður á hlut fer úr 2,27 krónum á fyrri árshelming í fyrra niður í 1,06 krónur í ár.
Rekstur heilt yfir í samræmi eða betri en áætlanir
Handbært fé frá rekstri var neikvætt um 42 milljónir en var jákvætt um tæpa 4,5 milljarða í fyrra. Handbært fé í lok tímabilsins nam 3.9 milljörðum króna og eign í ríkisskuldabréfum rúmlega 1 milljarður.
„Á fyrri helmingi ársins samanstóðu rekstrarfélög SKEL af Skeljungi ehf., Kletti– sölu og þjónustu ehf., samstæðu Orkunnar, þ. e. Orkan IS ehf., Lyfjaval ehf., og Löður ehf. sem og Gallon ehf. Rekstur þessara félaga var heilt yfir í samræmi við, eða betri en áætlanir sem kynntar voru í ársuppgjöri gerðu ráð fyrir. Helsta jákvæða frávikið í rekstri félaganna er rekstur Orkunnar sem hefur gengið vonum framar það sem af er ári,“ segir Ásgeir Helgi Reykfjörð Gylfason forstjóri Skel í uppgjörinu.
Verslunarrekstur Orkunnar og Lyfjaval seld til Heimkaupa
Helstu breytingar á eignasafninu var 3,5 milljarða króna fjárfesting Horns IV í Styrkási, móðurfélagi Skeljungs og Kletts. Skel seldi einnig allt hlutafé í Sp/f Orkufélaginu en salan kláraðist endanlega í lok júlí.
Verslunarrekstur Orkunnar og Lyfjaval voru seld til Heimkaupa og var Gréta María Grétarsdóttir ráðin forstjóri félagsins.
„Nýir stjórnendur hafa náð góðum tökum á rekstrinum undanfarin ár með lækkun rekstrarkostnaðar og fækkun stöðugilda. Félagið rekur 72 Orkustöðvar og 15 þvottastöðvar Löðurs með 38 stöðugildum. Viðskiptavinir félagsins hafa tekið mjög vel í þær tækninýjungar sem félagið hefur kynnt. Á fyrri árshelmingi nam EBITDA, án IFRS 16 áhrifa, 1.013 m.kr. hjá Orkunni og við búumst nú við að hún verði um 1.650 m.kr. á árinu. Við verðmetum Orkuna á 5.714 m.kr., sem jafngildir EV/EBITDA 5,0x í bókum okkar í meðfylgjandi árshlutareikningi. Við erum sérstaklega ánægð með að hafa nýverið gert samkomulag við Horn IV slhf., sem er framtakssjóður í stýringu Landsbréfa, um þátttöku í hlutafjáraukningu í Styrkási ehf.“ segir Ásgeir Helgi í uppgjörinu.
Samkvæmt því verður Styrkás ehf. eignarhaldsfélag um allt hlutafé í Skeljungi ehf. og Kletti – sölu og þjónustu ehf.
Eignarhlutur SKEL í Kaldalóni hf. lækkaði í virði um 302 m. kr. á fyrri hluta ársins.
„Norvik ehf. hefur jafnframt skrifað sig fyrir 500 m. kr. af nýju hlutafé. Við teljum að það sé rými fyrir áskoranda á smásölumarkaði og hlökkum til að kynna félagið betur í vetur. Eignarhlutur SKEL í Kaldalóni hf. lækkaði í virði um 302 m. kr. á fyrri hluta ársins. Sem stærsti hluthafi félagsins hefur SKEL gegnt stefnumarkandi hlutverki við uppbyggingu á Kaldalóni hf. Við teljum að áherslur félagsins um einfaldan rekstur, einfaldleika í eignasafni og lágmörkun kostnaðar verði félaginu farsælar til lengri tíma. Nýlega tilkynnti Kaldalón hf. að það hafi lokið við útgáfu ramma fyrir skuldaskjöl og ætti félagið því að geta sótt sér markaðsfjármögnun þegar það metur það hagfellt. Í sömu tilkynningu er haft eftir forstjóra félagsins að félagið muni ná markmiðum sínum fyrir skráningu á aðalmarkað fljótlega og undirbúningur þess hefjist þá þegar. Eignarhlutur SKEL í VÍS hækkaði um 111 m. kr. á fyrri hluta ársins,“ segir Ásgeir Helgi í uppgjörinu.
Hann telur jafnframt að stefnumörkun félagsins um umbreytingu úr rótgrónu tryggingarfélagi í vaxtafyrirtæki á fjármálamarkaði sem hófst fyrir um tveimur árum síðan sé góðþ
„Það er mikilvægt fyrir íslensk fyrirtæki á okkar litla markaði að hafa fjölbreytta tekjustofna. Frá áramótum hefur félagið hafið eigna- og sjóðastýringu í sérstöku félagi, SIV eignastýringu hf., og hluthafar samþykkt samruna við Fossa fjárfestingarbanka hf. með afgerandi hætti. Þá er ánægjulegt að sjá að viðsnúningur hefur orðið í sölu hjá félaginu og að því virðist hafa tekist mjög vel til með að laða til sín góða stjórnendur,“ segir Ásgeir Helgi.
„Salan markar ákveðin tímamót í sögu félagsins“
Einnig er greint frá því að nýlega var gengið frá uppgjöri vegna sölu á 48,3% eignarhlut SKEL í Orkufélaginu, móðurfélagi P/F Magn í Færeyjum.
Eftirstandandi skuldbindingar og eignir SKEL vegna Orkufélagsins eru söluréttur Hólma ehf. sem tilkynnt var um 15. febrúar og seljendalán sem veitt voru árið 2021 til kaupenda að fjárhæð um 460 m. kr.
„Salan markar ákveðin tímamót í sögu félagsins, sem hefur þá yfirlýstu stefnu að draga úr vægi sölu jarðefnaeldsneytis í eignasafni félagsins. Ætlun okkar er að halda stórum hluta söluandvirðis í fjárfestingum í Norður-Evrópu. Á fyrri árshelmingi setti SKEL fasteignafélagið Klettagarða 8-10 ehf. í sölumeðferð hjá fyrirtækjaráðgjöf Íslandsbanka hf. Nokkur tilboð bárust í allar eignir félagsins frá sérhæfðum aðilum, flest á viðunandi verðbili. Ákveðið var að hefja viðræður við einn tilboðsgjafanna um kaup félagsins í heild sinni, með það fyrir augum að einfalda samstæðu SKEL. Við vonumst til að ljúka sölu félagsins fyrir áramót.“
„Eignasafn SKEL er að taka breytingum og nemur vægi óskráðra eigna nú 67,9% en var 69,4% um áramót. Gera má ráð fyrir að hlutföll óskráðra eigna verði í kringum 50% til framtíðar, en það mun vitanlega ráðast að einhverju marki af gengisþróun skráðra eigna og endurmati óskráðra eigna. Lausafjárstaða félagsins er nokkuð rúm, en við munum þyngja vægi skráðra eigna og fasteigna í safninu á komandi misserum. Þann 12. apríl sl. greiddi félagið út arð sem samsvaraði 0,31 kr. á útistandandi hlut, eða 600 m. kr. SKEL tilkynnti um framkvæmd endurkaupaáætlunar að hámarksfjárhæð 250 m. kr. þann 12. júlí og hófust endurkaup daginn eftir, endurkaupum lýkur í síðasta lagi 31. desember nk. Í upphafi árs voru 1006 hluthafar í félaginu en við lok fyrri árshelmings voru hluthafar 1044,“ segir Ásgeir að lokum.
