JBT Marel, alþjóðlegt tækni- og hugbúnaðarfyrirtæki í matvælaiðnaði, skilaði rekstrarniðurstöðum umfram væntingar á fyrsta ársfjórðungi 2025.
Tekjur jukust umtalsvert og fjárhagsstaða félagsins er sterk.
Samkvæmt kauphallartilkynningu frá félaginu sýnir aðlöguð afkoma og fjárhagsleg frammistaða að samruninn við Marel hf. sé að skila tilætluðum árangri.
Þrátt fyrir að formleg GAAP-afkoma sýni bókfært tap vegna einskiptiskostnaðar, þá sýnir aðlöguð afkoma öflugan kjarnarekstur og skýrt virði samrunans við Marel, samvkæmt félaginu.
Marel-hlutinn sýndi rekstrarbata með aukinni framlegð og sterkri þjónustusölu. Kjarnarekstur félagsins var jákvæður, skuldahlutföll innan viðmiða og lausafjárstaða sterk.
Heildartekjur samstæðunnar námu 854 milljónum Bandaríkjadala, sem jafngildir um 110 milljörðum íslenskra króna á gengi dagsins.
Pantanir námu 916 milljónum dala, um 118 milljörðum króna og pöntunarstaða í lok mars var 1,3 milljarðar dala eða rúmlega 168 milljarðar á gengi dagsins.
Um 53% tekna voru af reglubundinni þjónustu og varahlutum.
Marel-hlutinn skilaði 445 milljónum dala í tekjur (um 57,3 milljörðum króna) og EBITDA framlegð upp á 11,5%, sem er umtalsverð bæting frá 9,6% í fyrra.
„JBT Marel hóf árið með öflugum hætti og fór afkoma fyrsta ársfjórðungs fram úr væntingum okkar,“ segir Brian Deck, forstjóri JBT Marel.
„Pantanir endurspegla styrkinn í breiðu og samþættu vöru- og þjónustuframboði okkar og við sjáum áframhaldandi góða eftirspurn á lykilmörkuðum á borð við alifugla-, kjöt-, drykkjarvöru-, lyfja- og gæludýrafóðuriðnað,“ bætir Deck við.
Skuldir félagsins voru bókfærðar á 1,99 milljarða dala eða um 256 milljarða íslenskra króna á gengi dagsins. Skuldahlutfall (net debt / EBITDA) lækkaði í 3,8x og stefnir í 3,0x fyrir árslok.
Aðlöguð EBITDA nam 112 milljónum dala, sem svarar til um 14,5 milljarða króna, með EBITDA framlegð upp á 13,1%, sem er 1,2 prósentustiga aukning frá fyrra ári.
Fyrirtækið áætlar að beinn kostnaður af nýjum tollum geti numið 50–60 milljónum dala árlega en vinnur að mótvægisaðgerðum og nýtingu alþjóðlegs framleiðslukerfis. Samsvarar það hátt í 7,7 milljörðum íslenskra króna.
„Óvissa í alþjóðaviðskiptum og mögulegar breytingar á tollastefnu skapa aukinn kostnað og áhættu. Við höfum brugðist við með markvissum aðgerðum til að draga úr áhrifum, m.a. með því að endursemja við birgja, hækka verð og færa innkaup nær framleiðslustöðum,“ segir Deck.
