Hlutabréfaverð Hampiðjunnar hefur hækkað um 6,5% í tæplega 300 milljón króna viðskiptum í morgun en félagið birti árshlutauppgjör eftir lokun markaða á miðvikudaginn.
Þar sem kauphöllin var lokuð í gær er um að ræða fyrsta viðskiptadag eftir uppgjör félagsins.
Gengi Hampiðjunnar stendur í 114 krónum þegar þetta er skrifað. Það sem af er ári er hæsta dagslokagengi félagsins 116,8 krónur á hlut.
Hlutabréf Hampiðjunnar hafa nú hækkað um rúm 12% það sem af er ári.
Þrjú einstök viðskipti fyrir 500 þúsund hluti hafa farið í gegn í dag. Ein utanþingsviðskipti á genginu 110,5 krónur á hlut sem jafngildir um 55 milljón króna viðskiptum.
Tvö viðskipti með jafn marga hluti fóru síðan í gegn rétt fyrir klukkan tíu á genginu 113,5 og 113 krónur á hlut sem jafngildir 56,7 milljón króna viðskiptum og 56,5 milljón króna viðskiptum.
Hampiðjan hagnaðist um 2,8 milljónir evra, eða um 413 milljónir króna, á fyrsta ársfjórðungi, sem samsvarar 3,4% aukningu frá sama tímabili í fyrra.
Rekstrartekjur Hampiðjunnar á fyrsta fjórðungi hækkuðu um 17,4% milli ára og námu 91,9 milljónum evra eða um 13,4 milljörðum króna.
EBITDA-hagnaður samstæðunnar jókst um 34,5% og nam 11,2 milljónum evra eða um 1,6 milljörðum króna. Fjármagnskostnaður og mikill gengismunur drógu niður hagnað félagsins á fjórðungnum.
Hjörtur Erlendsson, forstjóri Hampiðjunnar, bendir á að hluti af aukinni veltu samstæðunnar er tilkominn vegna innkomu norska félagsins Fiizk sem varð hluti af samstæðunni frá 1. september 2024 og neta- og kaðlafyrirtækisins Kohinoor sem kemur inn í samstæðuuppgjörið frá 1. febrúar í ár.
Ef einungis eru tekin þau félög sem fyrir voru í samstæðunni þá var söluaukning þeirra 7,3%.
