Hefja nýja árið af krafti

Uppbygging landeldisstöðvar First Water í Þorlákshöfn er hafin af fullum krafti. Fyrsta skóflustungan að nýju vinnsluhúsi á Laxabraut var tekin í síðustu viku en stefnt er á að húsið, sem verður alls 30.500 fermetrar að stærð, verði tekið í notkun í skrefum.

„Við gerum ráð fyrir því að hefja framkvæmdir í byrjun næsta árs. Við erum búin að vinna jarðvinnuna og núna erum við í útboði á bæði búnaði og á húsinu sjálfu,“ segir Eggert Þór Kristófersson, forstjóri First Water.

„Þetta eru sex fasar hjá okkur og það má segja að tveir fasar saman kalli á ákveðna vinnslu. Þegar við erum búin með fjóra fasa þá yrði tækjabúnaðurinn alltaf meiri og meiri. Við byrjum að byggja vinnslustöðina á næsta ári og í rauninni verður húsið tilbúið 2027, en starfsemi í húsinu myndi síðan vaxa alveg til 2030 og árin þar eftir meðan við erum að fá uppskeruna út úr eldinu í auknum mæli.“

Fyrstu uppskeru lauk með slátrun 50 þúsund laxa í maí 2023. Í október sl. var þúsundasta tonninu á árinu slátrað hjá First Water og hafði uppskeran þá aukist um hátt í 60% frá árinu 2023. Stefnt er á að 50.000 tonna landeldisstöð verði byggð upp í 6 fösum og verði komin í fulla vinnslu árið 2029.

Alls mun laxeldi fara fram í 160 körum þegar stöðin er komin í fullan rekstur en eins og er hafa 20 kör verið reist. Í hverjum fasa er miðað við að 26 kör bætist við en 8 eru byggð í einu og síðan eru þau teknin í notkun. Áætlanir fyrir framkvæmdirnar haldist í helstu atriðum þrátt fyrir smávægilega hnökra, til að mynda hvað varðar afhendingu erlendis frá.

Nánar er fjallað um málið í Viðskiptablaðinu. Áskrifendur geta nálgast umfjöllunina í heild hér.