Heimsmarkaðsverð á olíu hélt áfram að hækka í morgun og fór verðið á tunnunni af Brent-hráolíu upp í 79,94 dali. Verðið hefur aðeins dalað síðan þá en ekkert bendir til þess að lækkanir séu í kortunum vegna stigmagnandi átaka fyrir botni Miðjarðarhafs.
Olíuverð lækkaði töluvert frá apríl til september en tók síðan við sér á ný í síðustu viku. Verðið á Brent hækkaði um 8% í síðustu viku í kjölfar þess að Íran lét rigna eldflaugum yfir Ísrael.
Samkvæmt Financial Times hafa fjárfestar á olíumarkaði áhyggjur af árásum á innviði sem gætu truflað olíuflutninga og/eða átökum sem loka Hormússundi.
FT greinir frá því að stórir vogunarsjóðir sem höfðu veðjað á að olía myndi halda áfram að lækka út árið séu nú að endurskoða stöðutökur sínar. Losað var um töluverðar skortstöður gagnvart verðinu á Brent í byrjun október.
Hins vegar voru tölvustýrðir sjóðir sem fylgja leitni markaðarins enn að skortselja olíu síðastliðinn fimmtudag, samkvæmt gögnum frá Société Générale.
