Úrvalsvísitalan lækkaði um hálft prósent í 5,6 milljarða króna veltu á aðalmarkaði Kauphallarinnar.
Rekja má stóran hluta veltunnar til 1,2 milljarða króna skiptisamnings þar skipt var á hlutabréfum í Alvotech fyrir hlutebréf í Reitum, Arion banka, Nova, Eik, Oculis og Eimskips, líkt og Viðskiptablaðið fjallaði um í dag.
Eik fasteignafélag lækkaði mest af félögum aðalmarkaðarins í dag eða um 3,4% í 91 milljónar króna veltu. Gengi Eikar stendur í 9,85 krónum á hlut og hefur lækkað um 9,7% í ár. Tilkynnt var í morgun um að Reginn hefði ákveðið að afturkalla yfirtökutilboð sitt í Eik.
Auk Eik, þá lækkaði hlutabréfaverð Kviku banka og Skaga um meira en 2% í dag.
Hlutabréf flugfélaganna taka dýfu
Flugfélagið Play, sem er skráð á First North-markaðinn, lækkaði mest af öllum félögum eða um 4,4% í 23 milljóna veltu. Gengi Play stóð í 4,3 krónum við lokun Kauphallarinnar.
Þá lækkaði gengi Icelandair um tæp 2% í 244 milljóna veltu og stóð í 1,01 krónu í lok dags. Gengi félagsins fór lægst í 1,00 krónur í viðskiptum dagsins. Hlutabréfaverð Icelandair hefur nú lækkað um 24% í ár.
Greint var í dag frá því að samninganefndir Félags flugmálastarfsmanna ríkisins (FFR) og Sameykis stéttarfélags í almannaþjónustu hefðu ákveðið að boða til yfirvinnu- og þjálfunarbanns ásamt tímabundnum og tímasettum aðgerðum við öryggisleit og farþegaflutninga fjóra morgna í maí.
