Hlutabréf í fataverslunarrisanum GAP hækkuðu um 24% við opnun markaða vestanhafs en fyrirtækið birti árshlutauppgjör þriðja ársfjórðungs í gær sem var betra en spár höfðu gert ráð fyrir.
Hlutabréf í GAP hafa nú hækkað um 75% á síðastliðnum sex mánuðum en gengið stóð í kringum 7 dali í maímánuði.
Gengið opnaði í kringum 16,8 dali í dag eftir miklar hækkanir í framvirkum samningum fyrir lokuðum markaði.
Samkvæmt uppgjöri gærdagsins seldi fyrirtækið föt fyrir 3,77 milljarða dali á þriðja ársfjórðungi sem er 6,7% minni sala en á sama tímabili í fyrra. Mun það þó vera meiri sala en markaðsaðilar bjuggust við samkvæmt FactSet en The Wall Street Journal greinir frá.
Hagnaður lækkaði úr 282 milljónum dala í 218 milljón dala milli ára og nam 58 sentum á hlut en greiningaraðilar bjuggust við 24 sentum á hlut.
