Hlutabréfaverð Síldarvinnslunnar hefur hækkað um 14% síðastliðinn mánuð eftir um 2,5% hækkun í 367 milljón króna viðskiptum í dag.
Gengi Síldarvinnslunnar byrjaði hækkunarferli sitt í kringum uppgjör þriðja ársfjórðungs en hagnaður félagsins á fyrstu níu mánuðum ársins nam tæpum 9 milljörðum íslenskra króna.
Gengið stendur í 105 krónum þegar þetta er skrifað sem en hlutabréf félagsins náðu sínu hæsta verði í ár þegar gengið fór í 126,5 krónur í janúar á þessu ári.
Í uppgjöri félagsins í lok nóvember sagði Gunnþór Ingvason forstjóri að félagið sé vel í stakk búið til að takast á við áskoranir framtíðarinnar.
„Sveiflur í ytra umhverfi og á mörkuðum eru ekki nýjar af nálinni í okkar rekstri. Það er mikill styrkur fyrir Síldarvinnsluna að hafa fjölbreyttan rekstur sem gerir félagið betur í stakk búið að mæta óvæntum áskorunum. Birgðir félagsins eru bókfærðar á 89 m. USD og hafa aukist um 30 m. USD frá áramótum. Munar þar mestu um mikla framleiðslu loðnuhrogna sem enn sitja í birgðum að hluta til,” segir Gunnþór.
Heildareignir samstæðunnar í lok tímabilsins voru 1,083 milljarðar Bandaríkjadala. Séu niðurstöður efnahagsreiknings reiknaðar í íslenskum krónum á gengi krónunnar í lok tímabilsins námu eignir samstæðunnar 148,1 milljarði króna, skuldir 63,7 milljörðum og eigið fé 84,4 milljörðum.
