Úrvalsvísitalan OMXI15 hefur hækkað um 6,7% frá því að Trump frestaði gagnkvæmum tollum um 90 daga síðastliðinn miðvikudag.
Fjölmörg félög, sem höfðu lækkað töluvert í aðdraganda ákvörðunarinnar, hafa tekið við sér á síðustu fjórum viðskiptadögum en til að mynda hefur gengi Oculis hækkað 22,6% á tímabilinu.
Hlutabréfaverð Oculis hefur farið úr 1.860 krónum á hlut í 2.290 krónur á hlut en gengi félagsins hækkaði um 5,5% í viðskiptum dagsins.
Hlutabréfaverð fjárfestingarfélagsins Skeljar hefur hækkað um tæp 9% á síðustu fimm viðskiptadögum en gengi félagsins fór upp um 2,6% í dag. Dagslokagengi Skeljar var 15,9 krónur.
Hlutabréf í JBT Marel hækkuðu um rúm 3% og var dagslokagengið 12.700 krónur á hlut. Gengi JBT Marel en enn um 25% lægra en fyrir mánuði síðan.
Gengi Heima hækkaði um tæp 3% í 163 milljón króna veltu og var dagslokagengið 35,4 krónur á hlut.
Hlutabréfaverð Festi hækkaði um 3,5% og lokaði í 300 krónum á hlut. Gengi Festi hefur nú hækkað um rúm 7% á árinu sem næstmesta hækkun ársins á eftir gengi Hampiðjunnar sem hefur hækkað um rúm 9%.
Heildarvelta á markaði var 3,4 milljarðar.
